16 maraw Octubre Negro ukatx mäkhipawayxi, kunanakas utjawiyäna uk amtañäni

Imagen

Phäñanak arxatirinakamp palla pallanakampi (Jamuqa: Llika)

Phäñanak arxatañatak sartasiñax Gonzalo Sánchez de Lozadax (Goni ñanqha sutimp uñt’at jaqi) Jilïr Irpirïkan ukjaw utjawiyi. Jupax Estados Unidoruw phäñx Chilïm aljañ munäna. Ukham lurañ munatap yatisaw markachirinakax sartasiwiyapxäna.

Sata qallta phaxsit 8 uru saraqkipana

Batallas markanw yapuchirinakax sartasiñ qalltawiyapxäna, jupanakax p’iqichiripar antutasiñap mayisaw Chukiyawur purinipxäna.

Sata qallta phaxsit 15 uru saraqkipana

Titi Qaqa quta jak’an jakasir yapuchirinakaw jan Chilïm aljasiñapatak thakhinak jark’antawiyapxäna.

Sata qallta phaxsit 19 uru saraqkipana

K’añask apnaqirinakax jan Chilïm phäñ aljasiñapatakiw irnaqañ mä uru sayt’awiyapxäna.

Aka uruw altu patankirinakax mä uru irnaqañ saytawiyapxi, jupanakamp chikax yatichirinakamp yaqha chiqanakar yapuchir saririnakampiw sartasiwiyapxarakïna.

Sata qallta phaxsit 20 uru saraqkipana

Sura Jathar sariririnakaw Wari Sayt’añ thakhi jist’antirinakamp ch’axwthaptawiyapxäna. Mä jiwataw utjawiyäna.

Jayp’utuqurux, Sura Jathar niya purxasax palla pallanakaw suxta yapuchirir jiwarayawiyapxäna.

“Jan juchan jaqiruw jiwayasipki” sasaw mä yapuchirix arsuwiyäna.

Sata qallta phaxsit 25 uru saraqkipana

Bolivia Irnaqirinakan Tamap (COB) irpirinakaw manq’at mutuñ amtawiyapxäna. Gonzalo Sánchez de Lozadax irptañ jaytjañapawa, janiw Chilïm phäñax aljaskaspati sawiyapxänwa.

Sata qallta phaxsit 29 uru saraqkipana

Jan irnaqañw qalltawiyapxäna, janiw kuna uru sartasiñ tukuyañs amtawiyapktti sawiyapxänwa.

Sata qallta phaxsit 30 uru saraqkipana

Walja markachiriw Chukiyawunx jan Chilïm phañ aljasiñapatak sartasiwiyapxäna.

Taypi sata phaxsit 3 uru saraqkipana

Kuka yapuchirinakaw sartasiñ qalltawiyapxäna.

Taypi sata phaxsit 8 uru saraqkipana

Altu Patan jach’a markanx jan samart’as sartasiñw amtawiyapxäna, pä jiwataw utjawiyäna.

Taypi sata phaxsit 9 uru saraqkipana

Altu Patanx, kimsaniruw palla pallanakamp jach’unakampix jiwayawiyapxäna, tunka suxtanirurakiw usuchjawiyapxäna. Gonix jan irpirïpanti sasin arsuñ qalltawiyapxäna.

Taypi sata phaxsit 11 uru saraqkipana

Sánchez de Lozadax palla pallanakaruw Altu Patar khithäna, 27209 Jisk’a Kamachirjamaw khithata sawiyänwa. Uka jisk’a Kamachix, jan phäñat pist’añatakix phäña apnaqañ chiqanakaw jark’aqaña sasaw säna.

Taypi sata phaxsit 12 uru saraqkipana

Markachirinakax jach’unakamp palla pallanakampiw ch’axwawiyapxi, 19 jiwataw utjawiyi.

Taypi sata phaxsit 13 uru saraqkipana

Mä phaxsiw sartasiñax utjxäna, ukjakiw uka pach sullka Irpirix janiw Sánchez de Lozadamp irptxäti sasin sawiyäna. Janiw uñjktan ukanak lurañx yanapkiristti, ukw markasar sañ muntha sasaw sawiyäna.

Chukiyawumpin Altu Patampin Santa Cruzampinx 20 markachiriw jiwawayxapxäna, ukjakiw ukham sawiyarakïna.

“Jan walir purt’aspa Gonixa, waranq kutpin jan walir purt’aspan” sasaw mä ijma mamax chachapar jiwat uñjasax Altu Patan arsuwiyäna.

Markachirinakar janir jiskht’kasax janiw phäñax anqa markanakar aljatäkaniti sasaw ukürux Sánchez de Lozadax arsuwiyäna, ukhamarus walja jiwat uñjasax markachirinakax Gonix sarxpan sasin sartasisipkakïnwa.

“Altu Patax sayt’ataw jikxatasi, janipiniw killt’ataxa” sasaw markachirinakax sawiyapxäna.

Taypi sata phaxsit 13 uru saraqkipana

Awiya Yala Markanakan Tamap (OEA) irpirinakaw Gonzalo Sánchez de Lozadar ch’amachawiyapxäna.

Taypi sata phaxsit 15 uru saraqkipana

Kimsa qhuyañ irnaqiriruw Patak Amayan palla pallanakax jiwayawiyapxäna. Gonix irptañ jaytjpan sasaw uka pach Marka Arxatirix yaqha markachirinakamp manq’at mutuñ qalltawiyäna. Gonimp Jaime Pazamp Manfred Reyesampix phäñ aljañatakix markar jiskht’aspan, Marka Utt’ayañ Tantachäwix utjpan, Phäñanak Apnaqañ Kamachix uñakipaspan sasaw ukham lurañ iyawsawiyapxäna. Sánchez de Lozadax janiw irptañ jaytjkäti sasaw sawiyapxäna, anqa marka yatiyirinakamp yanapayasisaw jan walinak sartasirinakxat arsuwiyäna, jan wali qullanak apnaqirinakw ukham lurasipki sasaw sawiyäna.

Manfred Reyes Villax irptañ jaytjañamaw sasin siriw juttha sasaw sawiyarakïna.

Taypi sata phaxsit 16 uru saraqkipana

50.000 jaqiw San Francisco palasar kayuk puripxäna, Gonzalo Sánchez de Lozadax irptañ jaytjpan sawiyapxänwa. CNN ukanx Gonzalo Sánchez de Lozadax sapa kimsanit paniniw nayan qhiparañax munapxi sawiyänwa, Fides rayrunkirinakaw ukham markachirinakar jiskht’as sawiyapxi sawiyänwa. Brasilampit Argentinampit khithanit irpirinakaw jan ch’axwañ utjañapatak irnaqasipkäna, jupanakax Carlos Mesampiw tantachasiwiyapxäna. David Greenlee, Estados Unidot khithanit irpirix uka pach Sullka Irpirimp tantachasiwiyarakïnwa.

Gonzalo Sánchez de Lozadax janiw irptañ jaytjkäti sasinw markachirinakar arxayawiyäna.

Taypi sata phaxsit 17 uru saraqkipana

Gonix, Carlos Sánchez Berzaín, Markar Arxatir Kamanapamp, Javier Torres Goitia, K’umar Jakañ Kamanapamp chikaw chhixwiririt Altu Patar tuykatawiyäna, ukatx Santa Cruzaruw sarxäna, ukanw Kamachiñ Tantachäwitakix mä qillqat wakt’ayapxäna, kamachirinakaruw irptañap jaytjawiyäna. Ukatx Estados Unidoruw sarxäna, ukjatpachw khayan jakaski.

Booliviax yäqatawa, Boliviax mayacht’asitaw jikxatasi.


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156