Mara T'aqax mä maramp yaqha maramp jaljañ uruwa

Imagen

Tata Intituqur ampar luqtkasa (Jamuqa: BTV)

Mara t’aqa phaxsit 21 uru saraqkipanx, markachirinakax kunayman chiqanw Tata Intir katuqañatak ukhamarak Pachamamat mayisiñatak jikthaptapxi. Aymaranx kunayman arunakaw ukür uñt’añatak utji, Mara T’aqa ukaw mä sutixa; “taq’a” arux “jalja, ch’uku, qurpa, t’aqxiri” ukham sañatakiw apnaqata. Ukhamax, Mara T’aqa urunx mä maraw tukuyi, yaqha mararakiw qallti.

Aymaranx “phaysi” sasaw Mama phaxsir sistan ukhamarakiw 28 ururusa. Nayra pachatpach aymaranakax laqamp uñch’ukis sarnaqañ yatitätanxa. Phaxsix mä kutw 28 urun uraq muyti, ukatw ukja urux phaxsi sasin uñt’ataraki. Mä maranx 13 phaxsiw utji, sapa phaxsix 28 uruniwa, 364 uruwa, ukhamarus 365 urüñapatakix mä urumpiw phuqhachañ munasi, uka uruw Mara T’aqaxa. Ukhamax Mara T’aqax mä maramp yaqha maramp jaljir uruwa.

Mara t’aqa phaxsit 21 uru saraqkipanx, saräwisaw jach’anchata, yupaychasitawa, markachirinakaw jikthaptapxi. Yaput achunak apthapiñax tukuyasxiwa, mayamp yapuchañatakiw jichhax wakt’ayasitäni. Mara T’aqat uksarux urunakax jach’aptarakiniwa.

Ukham saräwinak utjatap amuyasaw, Evo Morales Jilïr Irpirix sapa mara t’aqa phaxsit 21 uru saraqkipan samart’añ uru utjañap amtawiyi. Ukhamäñapatakix, 173 jakhun jisk’a kamach utt’ayawiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156