Willka Kutix ch'amaniptaskiwa

Imagen

Willka Kuti (Foto: BTV)

Markachirinakax 5527 Willka kutw katuqt’awiyapxi. Markasanx, 223 chiqanw Tata Intirux ampar luqtas katuqt’awiyapxi, waxt’anakas utjawiyarakiwa ukhamarakiw thuqht’äwinakasa. Suma jakañax utjpan sasaw jupanakax mayt’asiwiyapxi.

Nayra pachatpach achachila awichanakasax akham amtañ yatipxatayna, ukhamarus Iwrupat jan wali jaqinakax purinipxi ukatrak aka saräw jaytjañax utjawiyi. Jichhakiw aymar saräwinak arxatir wayna tawaqunakax mayamp amtañ qalltawiyapxi; 1981, 1982 maranakanw Tiwanakunx mayamp amtawiyapxi, qhipa maranakax waljanirakiw uka chiqarux sarxapxaraki.

Willka Kutix saräwis ch’amachi. Ukatw 2005 maran qasawi phaxsit 12 uru saraqkipanx 3018 Kamachx utt’ayawiyapxi, uka kamachimpiw Willka Kutix taqi markasan saräwipjam uñt’atäxaraki.

2009 maran mara t’aqa phaxsit 17 uru saraqkipanx, Evo Morales Jilïr Irpirix 173 jakhun jisk’a kamach uñt’ayawiyi, mara t’aqa phaxsin 21 urupax samarañ urüniwa sasaw amtawiyi. Wasürux Mayacht’at Markanakan Tamapan (ONU) tantachäwipanw mara t’aqa phaxsit 21 uru saraqkipanx Willka Kutiw uraqpachan amtatäni sasin amtawiyapxaraki. Willka Kuti, Mara T’aqa, Inti Raymi, Yasitata Guasú, Machaq Mara uka sutinakampiw aka urux uñt’ata, maratjam maratjamaw juk’amp ch’amachatäskaraki./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156