Real Madrid ukankirinakax Barcelonankirinakampiw jichhürux anatt'apxani

Imagen

Real Madridankirinakamp Barcelonankirinakampix Copa del Rey anatäwin katjasipxani / Jamuqa: ABC.es

Jichhürux Real Madridankirinakamp Barcelonankirinakampiw Copa del Rey anatäwin katjasipxani, Santiago Bernabéu anatañ chiqanw anatt’apxani, Madrid jach’a markana.

Nayrïr kutx Cataluña uraqinw anatawiyapxi, anata phaxsi qalltkipana, janiw khithis atipawaykiti, mayakam ch’am chikt’awiyapxi.

Real Madridan anatañ yatichiripax tata Santiago Solariwa, “khust’at anatt’äwiwa, Ispañan taqit uñt’at anatt’äwipawa. Aka anatäwix Ispañaruw uraqpachan anatäw p’iqt’ir markjam uñt’ayi” sasaw jupax arsuwiyi.

 Anatkasax ch’ama ch’am tukupxä sasaw tata Ernesto Valverdex arsuwiyi, jupax Barcelonan anatañ yatichiriparakiwa, “aka anatäwinw atipirix yatisxani, paypachanitx marnikiw qhipa anatäwir purini, mayaw jaqsuyasini” sasaw sawiyi.

Yaqha anatäwinx Barcelonaw atipt’aski, ukatw Real Madrid ukankirinakax aka anatäw atipañ munaski. “Kunatakis wakicht’asitäpxtwa. Pä wakiskir anatäwiwa, taqi anatirinakaw ukham utjatapat kusisipxtha” sasaw Vinicius anatirix arsuwiyi.

Kurmürux mayampw Madrid jach’a markan uka pä anatir tamankirinakax katjasiwiyapxani, ukhamarus yaqha anatäwin atipt’asiñatakiw yant’asipxani. Uka yaqha anatäwx Barcelonaw 57 ukjamp atipt’aski, ukxarux Atlético de Madrid tamarakiw 50 ukjamp arktaraki, Real Madridax kimsïr chiqankiwa, 48 ukjampi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156