2019 maranx, Boliviax yaqha markanakat sipans juk'amp qullqichäwip jiltayaskakini sasaw Uraqpachan Qullqi Utapankirinakax sawiyapxi

Imagen

Bolivian qullqichäwip jilxattayata (Jamuqa: Qullqichäw Uñjir Kamanan Uñt'ayata)

Boliviax yaqha markanakat sipans juk’ampik Awiya Yalanx qullqichäw jiltayaskani, 4,0% ukjäniwa sasaw Uraqpachan Qullqi Utapankirinakax yatiyawiyapxi, aka marax qasäwi phaxsinx ukhampin amuyatäxarakïna.

Uraqpachan Qullqi Utapankirinakax mara t’aqa phaxsin qullqichäwix kunjamänisa ukx amuyawiyapxarakiwa, “qullqichäw jiltayir markanakax 4% ukjaruw juk’aqtani. Pusi maranx akaw taqit juk’a” sasawiyapxiwa.

Awiya Yalampin Caribempinx, 1,7% ukjakiw qullqichäwix aka marax jiltani, “walja jach’a markan qullqichäwipax jan walt’añanki ukata”, ukham yatiyawiyapxi.

Brasilanx 2,2% ukjaw qullqichäwix jiltani sasaw qasäwi phaxsinx sasipkäna, ukhamarus jichhax 1,5% ukjakïxaniwa sawiyapxiwa: Paraguayanx 3,6% ukjat 3,3% ukjaruw juk’aqtayawiyapxi, Uruguayanx 1,8% ukjat 1,5% ukjaru, Ecuadoranrak 0,1% ukjat 0% ukjaru.

Aka marampix Boliviax suxta maraw yaqha markanakar atipxani, Evo Morales Jilïr Irpirix paqallq marw jiltayaskaraki. Machaq qullqichañ amtaw utt’ayawiyata, ukatw ukham qullqichäwix jiltaskaraki./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156