EMAPAx 14 waranq waranq bolivian payïr aguinaldomp alasirinakat katuqatayna

Imagen

Jamuqa: Nelson Murillo

14 waranq waranq bolivian EMAPAx payïr aguinaldomp alasirinakat katuqatayna, 34.375 irnaqiriw alasir sarapxatayna, ukhamw uka manq’añ aljañ uta irpirinakax yatiyawiyapxi.

Irnaqirinakat 15% aguinaldo markasan lurat yänak alasipxañapatak apaqasax khust’ayawiyata, qullqichirinakasaw aljt’asisipki sasaw tata Eugenio Rojasax arsuwiyi, jupax EMAPA irpirirakiwa.

“EMAPAnx 14 waranq waranq bolivian aljatat katuqawiyapxtha. Yaqha markan qullqichir utanakapaw alasiwiyapxitu ukhamarakiw jisk’a, tantiyu qullqichirinakasa” sasaw jupa tata irpirix arsuwiyi.

EMAPAx yänakap alji ukhamarakiw yaqha qullqichir utanakat (EBA, EASBA, Insumos Bolivia) alat yänaks juk’a qullqichirinakat alat yänaksa sasaw tata Rojasax arsuwiyi. 74 qullqichir utatw aljañatak alasipxi.

“Manq’anakamp k’allk’u millk’inakamp ch’amuñanakamp quranakamp mermeladanakamp chocolatenakamp yaqha yänak aljirinakampiw uka 74 qullqichir utanak taypinx utji” sasaw jupa tata irpirix arsuwiyaskaki.

Uka pachparakiw, jichhakamax EMAPAx 34.375 irnaqiriruw markasan lurat yänak alji, Doble Aguinaldo sutin wakichäwimpiw jawsañanakamp payllayas alji, EMAPA Digital ukas utjarakiwa.

1.700 manq’añw EMAPAx alji, uka manq’añanakax markasankirkamakiwa. Arusamp asukaramp qhusqhumpiw jilpachax aljata sasaw Qullqichäw Jiltayir Kamanax yatiyawiyaraki./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156