Bolivian qullqichañ amtapax Estados Unidomp Chinamp alakipäwin katjasipki ukatx jark'aqistaniwa

Imagen

Jamuqa: El Boliviano

Bolivian qullqichañ amtapax Estados Unidomp Chinamp alakipäwin katjasipki ukatx jark’aqistaniwa, Iwrupampin yaqha Awiya Yala markanakampinx jan walt’ayaskiwa sasaw tata Pablo Ramosax arsuwiyi, jupax Bolivia Jach’a Qullqi Uta (BCB) irpirirakiwa. Bolivian qullqichäwipax markas pachpan qullqichatampiw juk’ampis ch’amachasi sawiyiwa.

“Markas pachpan qullqichatamp ch’amachasiñatakiw aka amtax wakt’ayata, janiw anqa markanakan qullqichatax jaytjatäkarakiti, ukax wakisirakiwa. Ukhamïpanx, kunjamas luratäni ukaw aka amtanx utji. Uraqit apsutamp anqa markanakar aljatamp sarnaqaskaksna ukax uraqpachan jan walt’añax utjki ukjax juk’amp jan walt’añaw akan utjaspa, ukhamarus akanx markasan luratamp ch’amachasiñatakiw amtata” sasaw yatiyirinakar sawiyi.

Yapuchäwimpiw ch’amachasktan, ukampiw yänakan chaninakapax jan mayjt’kiti ukhamarakiw yänak luratasamp servicionakampix qhipa maranakanx qullqichäwisax jiltayata, anqa markanakan jan walt’añax utjawayki ukax janiw jan walt’aykistuti sasaw tata Ramosax qhanancht’awiyi.

Estados Unidomp Chinamp alakipäwin katjasipki ukax uraqpachan qullqichäw “jarichani”, anqa markanakar aljkasax chaninakax ukjat ukjat mayjt’ani, ukhamax ch’ama ch’am tukuñaw markanakan qullqichäwipanx utjaspa, juk’amp katjasipxan ukax Bolivianx alakipasiñaw jan walt’ayat uñjasispa sasaw sawiyi.

Ukhamarus marka amtamp ayllu amtamp qullqichañ amtamp amuyt’at amtasampix 2006 maratpach sarantatäski, ukampiw anqa markanakan jan walt’añax utjki ukatx Boliviax jark’aqasiwiyi, markas pachpanw qullqichäwix ch'amachata sasaw qhanancht’awiyi.

“Anqa markanakan qullqichatax janiw jan walt’aykistuti sasin sisksnati jan ukax qullqichäwis ch’amachañax markas pachpan apnaqatawa, aka qhipa maranakanx qullqichäw jiltayirinakax markas pachpan uñstawiyi” sasaw qhanancht’awiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156