INSAx qarwa kasta uywanak uywachirinakar arxatañatakiw seguro utt'ayañ amtaski

Imagen

Qarwanaka (Jamuqa: Llikat apsuta)

Instituto Nacional del Seguro Agrario (INSA) ukankirinakax qarwa kasta uywanak uywachirinakar arxatañatakiw mä seguro uñstayañ munasipki, q’isu q’isump khunumpiw qarwanakax jiwari, ukatw arxatañ munasipki.

“Q’ixu q’ixump uywanak jiwayasipki jupanakar seguro churañ amtasipktha. Aka marax walja uywaw jiwat sasaw yatiyapxi. Walpin jalluntawiyi sasaw nayax sistha, walpin jalluntki ukjax walja q’ixu q’ixuw utji” sasaw tata Erik Murillox arsuwiyi, jupax INSA irpirirakiwa.

Walja uywan jiwaratapatw ukham amtañ munasipki. Qarwa kasta uywanak uywachañ ch’amachirinakamp chikaw ukham amtawiyapxatayna. Municipio irpirinakamp departamento irpirinakampiw ukham amtañ mayiwiyapxaraki.

“Jichhax juk’amp jan walt’äwinakat arxatañ mayipxäxa, walpin khunki ukatakiw munasi, janiw ukham uñjañ utjkiti. Yaqhip chiqanx paya, kimsa, phisqha uruw khunuñ yati, yaqhip kutix ukham khununtatapax uywaruw jan walt’ayi, jiwayiwa” sasaw arsuwiyi.

Marka irpirinakaw seguro ukatakix qullq churapxani ukhamarakiw municipionakas departamento irpirinakasa, aka maraw taypi sata phaxsin ukamp irnaqañ qalltañ munatäxi sasaw tata Murillox sawiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156