Tata Moralesax mä jach'a yatiqañ utw Altu Patan luqtawiyi

Imagen

Altu Patanw aka wali suma yatiqañ utax jikxatasi / Jamuqa: BTV

Evo Morales Jilïr Irpirix BTH Jach’a Yatiqañ Utw Altu Patan luqtawiyi, Santiago II sutin chiqana. 17.200.000 bolivianompiw uka yatiqañ utx utachayapxatayna, “Boliviax Mayjt’askiwa, Evox Phuqhiwa” wakichäwimpiw irnaqayapxatayna.

34 yatichañ utamp yänak lurañ utanakampiw utji. Ukanw yatiqirinakax utachañxat, lusa qhanxat, manq’anak wakiyañxat, Pachamama uñjañxat, sawuñ p’itañxat, uñatatt’asiñxat yatiqt’apxani.

Altu Patax 34 marwa amtani, ukatw irnaqatanakax ukham luqtatäski. Achuqa phaxsit 06 uru saraqkipanw uka jach’a markax mara phuqhani.

“¿Kunats aka tecnológico yatiqañ utax utji? Altu Patanx yänaka lurañ utanakaw utjxi. Yatiqirinaka, ¿yatipxtati? Yatiñamp tecnologíampiw jan mayt’asiñäxiti. Ukaw lurañasa. Saräwisamp markasamp marka apnaqañampix qhispiyatäxiwa” sasaw Jilïr Irpirix arsuwiyi.

Aka yatiqañ utax Bolivianx taqit jach’awa. Ukanx tecnologíat yatichirïñatakis yatiqt’apxarakiniwa.

Juk’amp sum yatiqt’apxam, Boliviax jumanakan luratamampiw akat qhiparux jiltani, ukatw marka irpirinakax yatiqäw utjañapatak kunayman wakichäwinakamp irnaqasipki sasaw Jilïr Irpirix arsuwiyi.

“Jichhax janiw Estados Unidot khithanit irpirix apnaqxistuti. Qullqichäwx janiw FMI ukankirinakax apnaqxapxiti. Jiwasaw yatxatatanakasamp chik akat qhipar jakañasx amttan, ukhamarus yatiñ jan mayt’asiñax janiw jank’äkiti. Ukatw yatiqañ utanakan yant’añ utanak lurapxtha ukhamarakiw jach’a yatiqañ utanaks yatiqañatak lurapxtha” sawiyiwa.

Tata Roberto Aguilarax arsuwiyarakiwa, jupax Yatichañ Kamanawa. 12 yatiqañ utaw Altu Patanx yänak lurañ utanïpxani ukhamarakiw tecnología ukamp yatichatäni; yaqha departamentonakanx uka pachpaw utachayatäni sasaw jupax sawiyi.

Uka pachparakiw, 71 irnaqiriw uka yatiqañ utan yatichañatakix katuqatäni sasaw yatiyawiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156