Venezuela palla pallanakax mayacht'asitaw jikxatasipxi sasaw tata Nicolás Madurox arsuwiyi

Imagen

Nicolás Maduro, Venezuela Jilïr Irpiri (Jamuqa: teleSUR)

Nicolás Maduro, Venezuela Jilïr Irpirix Venezuela palla pallanakax mayacht’asitaw Estados Unidompit yanapirinakampit aka marka arxatañatakix jikxatasipxi sasaw wasürux arsuwiyi.

“Markasanx Bolivar Amtan Palla Pallanakaw utjistu. Jan khithis pantjaspanti. Jichhax Venezuelar arxatañatakiw Bolivar Amtan Palla Pallanakax utji, markasan utjaskañapatakiki, jan ch’axwañ utjañapataki, markasan mayacht’asiñapataki” sasaw jupa Jilïr Irpirix Bolivar Amtan Palla Pall Jach’a Yatiqañ Utanx arsuwiyi, Caracas jach’a markana, ukanx 966 palla pallaruw tenientjam alférezjam utt’ayawiyapxaraki.

Estados Unidonkirinakamp yanapirinakapampix Venezuela palla pallanakaruw qhipa urunakax jan walt’ayañ  munasipki, ukhamat jupanakax t’aqa t’aq sarnaqayañ munapxi ukhamarakiw ch’amampis aka markar mantaniñ munapxi sasaw tata Madurox arsuwiyi.

“Markasan Bolivar Amtan Palla Pallanakapax janiw t’aqxtapkiti, irpirinakar ch’amachasipkakiwa, janiw ch’am jiwt’ayasipkiti, mayacht’asitakïsipkiwa” sasaw tata Madurox qhanancht’awiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156