Jilïr Irpirix ayllun jakasirinakan sartasipxatap Surinaman arskasax jach'acht'awiyi

Imagen

Bolivia irpirinakamp Surinam irpirinakamp tantachasipxatapa (Jamuqa: UCP)

Evo Morales Jilïr Irpirix, Dési Bouterse, Surinam irpirimpiw tantachasiwiyi, ukanx kunjams ayllun jakasirinakax markasan sartasiwiyapxi, marka apnaqañ qalltawiyapxi ukxat arsuwiyi.

“Bolivianx, yaqha markankirinakax apnaqapkän ukjax, ayllun jakasirinakarux tukjañ munapxäna. Nayra achachila awichanakaw sartasiwiyapxi, jichhax marka apnaqañ mayamp qalltawiyapxtha. Nänak pachpaw apnaqasipxtha. Surinam markampix ukham luratax niya kipkakiwa” sasaw tata Moralesax qillqatanak rixt’kasax arsuwiyi.

Akar puripxatajax paypach markan pisin jakasipki jupanakar yanapt’añatakiw askïni sasaw Jilïr Irpirisax arsuwiyaraki.

“Markanakasar qhispiyañatak kunjams irptatäski uk ch’amachañatak ukhamarak yatiyasiñatakiw akham tantachasita. Jan yaqha markanakamp apnaqayasir yäqat markanakäsna ukaw walpin munata, ukatakiw akham sarantata” sasaw Bolivia irpirix arskas sawiyi.

Aka tantachäwinx aski amtanakax uñstaspa ukw munapxtha sasaw tata Boutersex arsuwiyaraki.

Tata Moralesax uka markan irpirinakapamp tantachasiñatakiw sari: qhuyan irnaqañxata, yapuchañxata, umxata ukhamanakatw aruskipt’awiyi, amtanakas irnaqañatak utjarakiwa./RAR

 


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156