Masïñ Rusia Jach'a Yatiqañ Utankirinakax Doctor Honoris Causa luqtäw Morales Jilïr Irpirisar churawiyapxi

Imagen

Jilïr Irpirix luqtäw katuqasiski

Evo Morales Ayma Jilïr Irpirisarux Doctor Honoris Causa luqtäw Masïñ Rusia Jach’a Yatiqañ Utanx (Rusia arunx RUDN ukham uñt’atawa) churawiyapxi, uka yatiqañ utax Moscú jach’a markan jikxatasi.

“Jilïr Irpiri, RUDN ulaqan amtap yatiyañaw wakt’itu, 2019 maran willka kuti phaxsit 11 uru saraqkipan amtata. Taqiniw  Doctor Honoris Causa luqtañx amtawiyapxtha (…)” sasaw  tata Evgueniy Leonidovich Schelsniakax arsuwiyi, jupaw uka jach’a yatiqañ utan irpiriparaki. “Rusiamp Boliviampix juk’amp yatichäwimp yatiñamp yanapt’asisipki, paypach markax masinakjam juk’amp sum apasisipki” ukatw ukham luqtasipkaraksma sasaw yamakis qhanancht’awiyi.

Jilïr Irpirisax ukham jupar yäqapxatapata, markasar yäqapxatapatw uka jach’a yatiqañ utankirinakar jallallt’awiyi. Arskasax kunjams 13 maran markas apnaqawiyi ukw arsuwiyi; qullqichäwix jiltawiyiwa, anqa markanakatpach ukham irnaqatx yäqapxi sasaw sawiyi.

“Jilata Irpiri, yatichirinaka, ulaqankirinaka, markaj irpirinaklanti, Bolivia markajlantiw arsuwiyäxa, akham luqtapxista yukatw jallallt’apxsma” sasaw tata Moralesax arsuwiyi.

Jichhakamax pusi tunk suxtan kutiw Bolivia irpirirux 2006 maratpach ukham luqtäwinak churawiyapxi.

Anchhax, 50 Bolivia markachiriw uka jach’a yatiqañ utanx postgrado yatiqäwinkasipki./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156