Tata Evo Moralesamp tata Vladímir Putinampix chikt'at irnaqañatakiw laphinak rixt'awiyapxi

Imagen

Evo Morales, Bolivia irpirimp, Vladímir Putin, Rusia irpirimpi (Jamuqa: Anqa Markanakamp Aruskipir Kamanan uñt'ayata)

Evo Morales, Bolivia irpirimp, Vladímir Putin, Rusia irpirimpix chikt’at irnaqañatakiw laphinak jichhürux rixt’awiyapxi, Boliviampir Awiya Yalampir jiltayañatakiw ukham amtawiyapxi.

Rusiampin Boliviampin chiqpach irnaqapxatap aka amtampix ch’amacht’asktan sasaw tata Putinax arsuwiyi. Markanakasan jiltañapatakiw amtawiyata, juk’ampiw qullqichañatak qullqix utjani, alakipasiñas uka pachpraki, ukham amtawiyapxtha sasaw sawiyi.

Gazprom Rusia qullqichañ utan yanapt’apampix nuclear jach’a utax niyaw tukuyatäxi sasaw qhanancht’awiyi. Lamar qutat 4.000 metro patanw uka utax utachatäski, nuclear lusa qhanaw utjani, ukampiw yänak lurañ utanakanx irnaqapxani ukhamarakiw qullañ utanakans yapuchäwinsa sasaw arsuwiyi.

Yapuchäñataki, Bolivian litiopamp jan q’añuchir tecnologíamp irnaqañataki, Santa Cruz lata jamach’inak puriñawja jach’aptayañataki, pä lamar qutar purir siqitit thakhi lurañataki, phayasiñ samanamp jaqi q’ipir k’añaskunak apnaqañataki, yapuchañ wanunak utjañapataki, yatichäw ch’amachañatakiw yanapkipt’asiñ amtawiyata sasins qhanancht’awiyarakiwa.

Akham amtanakampix markasan qullqichäwipax juk’amp jiltaskakiniwa sasaw tata Moralesax arsuwiyi.

“Akham amtatax alakipasiñatak juk’amp qullqi utjañapatak alakipasiñatakiw yanapt’istu (…) Awiya Yalatakix Rusiamp irnaqañax wakiskiriwa, juk’ampis yaqhanakat arxatasiñataki” sasaw Jilïr Irpirix sawiyi.

Tata Putinax kunayman markan kamachinak yäqasiñapatakiw irnaqi, ukatw jupar yäqtha; yaqha markanakax jupanakan amtapak phuqhayañ munapxi, mun jan mun kuns lurayañ munapxistu, palla pallanakamp mantañ yatipxi ukax janiw askïkiti sasaw yamakis sawiyi.

“Juk’a markanakan irpirinakapakiw yaqhanakamp yäqayasiñatak sartasipxtha, jan markanakan apnaqayasipxañapataki, markanakasar yäqayañataki. Jank’ak kunayman markan markapjam uraqin utt’ayasxsna, uraqpachan markachirjam uñt’atäsxna ukaw munata” sawiyiwa./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156