Estados Unidox yanapä sasakiw Venezuela apnaqañ muni sasaw Nicolás Maduro Jilïr Irpirix arsuwiyi

Imagen

Estados Unidox Venezuelar jan walt'ayaskakiwa / Jamuqa: Panorama

Tata Donald Trumpati Awiya Yala markachirinakar khuyapayañ munchi ukax markaparuw mantayasiñapa sasaw Venezuela Jilïr Irpirix arsuwiyi.

Estados Unidonkirinakax yanapä sasakiw Venezuela markan yänakapx jamasatjam lunthapsuñ munapxi sasaw tata Nicolás Madurox sawiyi, jupax Venezuela irpiriwa.

“Donald Trumpax apayanki ukax janiw yanapäkiti, janiw jaqir khuyapayañäkiti” sasaw tata Nicolás Madurox ABC News ukankirinakamp aruskipkasax arsuwiyi.

“¿Kuns Donald Trump jupax Venezuelat muni? ¿Markar yanapaña? Janiwa, uraq manqha phäñanak muni, uka phäñalaykuw ch’axwañ muni, yänakaj muni” sasaw arsuwiyi.

“Trumpati Awiya Yala markachirinakat amtaschi ukax markaparuw mantayasiñapa” sasaw Venezuela Jilïr Irpirix arsuwiyi.

Donald Trumpamp aruskipaña

Arskasax tata Nicolás Madurox jan walt’äwinak askichañatakix aruskipiristwa, “Venezuela markampin aksa uraqinkirinakampin sum jakasipxañapatakix  kawkharuy sarañächi uka chiqakamax Donald Trump jupamp ampar q’apt’asir sararakiristwa, purapat yäsisaw niyasa” sawiyiwa.

Tata Madurox Donald Trump jupampix “kunjams 21 patak maranakanx Awiya Yalankirinakax askichastan ukxat aruskipañatakix qunt’asiristwa. Nänakax markan munañapamp apnaqirïpxtwa, markachirinakat arxatasiñ amuy apnaqapxtha ukhamarakiw kunayman amuyuninakarus yäqapxtha” sasaw qhanancht’awiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156