300 markachirit jilaw Markasan Pä Patak Mara Phuqhañ Amtap wakt'ayañatakix tantachasipxani

Imagen

Juan Carlos Huarachi, COB irpiri (Jamuqa: BTV)

Markasan Pä Patak Mara Phuqhañ Amtap wakt’ayañatakix willka kuti phaxsit 06 uru saraqkipanw Qucha Pampan tantachasitäni, 07:00 arumirjäkipana, Killa Qulluna. 270 markachiriw sapa departamentot puripxani, 70 p’iqichirirakiw kunayman marka tamanakatäpxarakini sasaw jichhürux Coordinadora Nacional por el Cambio (CONALCAM) ukankirinakax yatiyawiyapxi.

“Killa Qullunw jikisitäni, Casa Campestrena. Sapa CODECAMatw p’iqichirinakax puripxani, 270 p’iqichiriw utjani, yamakis paqallq tunkaniw markachirinakan tamanakapat puripxani” sasaw tata Juan Carlos Guarachix arsuwiyi, jupax Bolivia Irnaqirinakan Tamapan irpiriparakiwa.

Sapa departamenton aruskipasiwayki ukanakaw uñt’ayatäni, ukhamarjamaw aruskipatäni, sapa departamentonkirinakax 20 k’atw arsupxani sasaw CONALCAMankirinakax amtawiyapxatayna.

CONALCAM irpirinakax phisqha k’atw arsupxani, ukxarux marka irptañ amtaw 2020 marat 2025 marakam irnaqañatak utt’ayatäni sasaw jawillt’äwinx saraki./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156