Tata Moralesax kunayman irpirinakampiw Rusian tantachasini

Imagen

Bolivia Jilïr Irpirimp Rusia Jilïr Irpirimpi (Jamuqa: Yatiyir Kamanan Uñt'ayata)

Evo Morales Jilïr Irpirix illapüruw Rusiar purini, ukanx kunayman irpirinakampiw tantachasini, Vladimir Putin irpir masipampis tantachasirakiniwa, ukhamw tata Diego Paryx yatiyawiyi, jupax Anqa Markanakamp Aruskipir Kamanasawa.

Tata Moralesax Surinam markatx Moscú jach’a markaruw sarani, willka kuti phaxsit 10 uru saraqkipanw purini. Ukanx yanapt’asiñxat ukhamarak phuqhacht’asiñxat Rusia irpirinakamp aruskipt’ani.

“Jilïr Irpirix jan samart’asaw irnaqani, mä urukïniwa. 20 pachat jilaw 8 pacha irnaqañatak sarani” sasaw tata Paryx yatiyawiyi, arsutapx Bolivia Yatiyir Utankirinakaw (ABI) uñt’ayawiyapxi,

“Arumirjax, (Moscú jach’a markar) purkasax, Jilïr Irpirix Markanakan Jach’a Utaparuw sarani, ukanx yaticht’aniniwa, uka jach’a yatiqañ utanx luqtäw churapxani” sasaw sawiyi.

Chikürutpachx, Jilïr Irpirix Rusia Jilïr Irpirimp tantachasiñatakiw saräwinak phuqhaskani.

Janiw jilïr irpirinakak tantachasipkakiniti, yamakis Rusia kamananakamp Bolivia kamananakamp tantachasipkani ukankaniw tata Moralesaxa, ukanx yanapt’asiñatakiw laphinak rixt’apxani.

Paypach markaw juk’amp sum alakipasiñ muntan, chikt’ataw irnaqañ munata sasaw yamakis tata Paryx arsuwiyi

“Bolivia irpirinakjamax Boliviamp sum apaski uka markampiw yanapkipt’asiñ munapxtha (…) Rusiampix kunaymantuqitw irnaqsna, ukhamaw uka markaxa, anqa markanakan tantachaskasas ukhamaraki” sasaw tata Paryx arsuwiyi.

Puraptuqut yäqasisaw jan kuns mun jan mun luras Rusiamp Boliviampix yanapkipt’asita sasaw sawiyi.

Rusiax anqa markanakan tantachaskasax wali yäqatawa, ukatw Boliviax uka markamp yanapkipt’asi, anqa markanakamp tantachaskasax pachpa amuyunakampiw saratäspa, ukaw wali wakiskiri./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156