Kunjams chhijlläwin sarantapxani ukxatw MAS tantachäwinx aruskipapxani

Imagen

MAS ukankirinakax tantachasipxaniwa /Jamuqa: Imata

Jurpürux MAS-IPSP ukankirinakaw Qucha Pampa jach’a markan tantachasipxani. Uka tantachäwinx kunjams taypi sata phaxsin utjkani uka chhijlläwitakix sarantatäni ukxatw aruskipapxani, ukhamw tata Leonardo Lozax arsuwiyi jupax Chapare yapuchirinakan irpiriparakiwa.

“Chhijlläwitakix kunjams markasan ukhamarak anqa markanakan sarantatäni ukxatw aka tantachäwinx amtatäni, ukhamäniwa” sasaw arsuwiyi. Tantachäwirux kunayman chiqatw markasatx purnuqapxani sawiyiwa.

Teodoro Mamani, CSUTCB irpirix MAS-IPSP tantachäwirux sarapxarakïwa, ukanx yaqha marka tamanakampiw jikisipxäxa sasaw sawiyi.

Uka tantachäwinx kunjamas nayrïr phaxsix chhijlläwinkata ukxat amuykipt’asini, taypi sata chhijlläwitakis aruskipt’asirakiniwa, uka phaxsiw Evo Morales Jilïr Irpirix yaqhanakamp yant’asini, jupaw MAS-IPSP ukan chhijllayasirixa.

“Taypi sata phaxsinw, Bolivia markachirinakax irpir ajllipxani, nänakax sum amuyt’as ajllipxañap munapxtha. Irpirinakar k’umirinakarux lurañanakat aruskipañ mayipxäxa, janiw aliq jan amuyun arunak apnaqas aruskipañxa” sasaw mama Silvax sawiyi.

Tantachäwinx wakiskir amtanakaw utjani, janiw departamentotakikixa, markaspachatakiwa sasaw tata Gonzalo Aguilarax arsuwiyi, jupax Uru Uru kamach luririrakiwa. Tata Evompir tata Álvarompir ch’amachañatakix Uru Urunkirinakax irnaqasipkakïwa sasaw arsuwiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156