Awiya Yalan p'iqichirinakax tata Moralesaruw Bolivia chhijlläwin atipatapat jallallt'awiyapxi

Imagen

Awiya Yalan p’iqichirinakax Evo Morales Jilïr Irpiriruw chhijlläwin atipatapat jallallt’awiyapxi, jupax Bolivian walürux atipawiyi.

Bolivia markaruw Evo Moralesan atipatapat jallallt’añ muntha sasaw wasürux tata Diosdado Cabellox yatirinakamp aruskipkasax sawiyi, jupax Partido Socialista Unido de Venezuela (PSUV) Sullka Irpirirakiwa.

Estados Unidonkirinakax walür utjawayki uka chhijlläw Carlos Mesar atipjat uñjasax jan walt’ayañ munasipki sasaw jupax arsuwiyi, Marka Utt’ayañ Tantachäw jupax Venezuelan irptaskaraki.

“Estados Unidox Bolivian utjawayki uk uñjasaw llakisiski. Marka apnaqasiñapat llakisisipkpan, taqi jan walt’äwinakapat qhananchapxpan, Donald) Trump Jilïr Irpiripat yatxatasipkpan” sasaw tata Cabellox arsuwiyi.

Chhijllayir Marka Utax (TSE) Transmisión de Resultados Electorales Preliminares (TREP) ukanw jakhthapit uñt’ayawiyi, ukanx tata Moralesax 46.86% jaqüwiniw uñsti, Mesarakiw 26,73% ukjani, 95,22% jaqüwiw jakhthapitäxi.

Khithiti chikatat mä jaqüwimp katuqkan jupa jan ukax 40% jaqüwit jila katuqiri, sapa patakat tunkamp payïrir atipirïki jupaw Jilïr Irpirïni ukhamarak Sullka Irpirïni sasaw Tayka Kamachinx sixa.

“Boliviax atipawiyiwa. Kunayman saräw yäqir amtaw atipawiyi, uka pachpankiri, Bolivia markan ukhamaw utjawiyi. Yäqayasiñaw atipawiyi, suman jakañaw atipawiyi, markanakasaw atipawiyi” sasaw William Castillox Twitteran arsuwiyi, jupax Venezuelan Yaqha Markanakamp Aruskipir Sullka Kamanaparakiwa.

Colombianx, Fuerza Alternativa Revolucionaria del Común (FARC) ukankirinakaw arsuwiyapxaraki, jupanakax Movimiento Al Socialismoruw (MAS) jallallt’awiyapxi.

Tata Moralesarux “mayamp Bolivia markankirinakax chhijllawiyapxi. Qamirinakat sinti arxatasirinakan jan wali luratanakapatx Awiya Yala uraqisanx arxatasitawa, jiwaspachaw apnaqastan. Suma jakañ amuyux utjaskakiniwa, taqi chuymaw jallallt’apxsma” sasaw FARC ukankirinakax Twitteran arsuwiyapxi.

Tata Hugo Gutiérrezax Chilin arsuwiyaraki, “¡¡Muspharkay uruwa!! Nayrïr jaqüwin atipawiy sapxituwa…¡Evo Morales! Aruntt’apxsmawa, Jallallt’apxsmaw Jilïr Irpiri” sasaw Twitteran sawiyi, jupax Partido Comunistankirirakiwa./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156