Irpirinakar k'umir chhijllayasirin Bolivian jan walt'ayatapat arsusipki

Imagen

Carlos Mesa, Comunidad Ciudadana chhijllayasirix jan walt’äwinak utjañap muni, Bolivia markachirinakpur ch’axwayañ muni, 2003 maran Altu Patan utjawayki ukhama sasaw Natalia Ruiz jamuqirix nayra Radisson qurpachañ utan arsuwiyi.

“Mays maysankir Bolivia markachirinakaruw ch’axwayañ muni. Janiw kunjam askichañs munkiti. Jaqunak jakhuñax janiraw tukuyatäkiti” sasaw Chhijllayañ Marka Uta irpirinakan tantachäwipanx Prensa Latinankirinakar sawiyi.

Comunidad Ciudadana (CC) ukankirinakax jaqüwinak jakhthapiñ chiqaruw ch’amamp mantawiyañ munapxi, ukatw jach’unakax jachayir samananakamp jupanakar tutukjayawiyapxi.

Ch’amampikiw mantañ munawiyapxi, “¡Evox jiwpan!” sasaw arnaqasiwiyapxi. Jaqüwinak jakhthapiñ utar mantañatakix qalampiw mä jach’urux nayrat churt’awiyapxi, mä yatiyirirus usuchjawiyapxarakiwa.

Jichhax Radisson qurpachañ utax Real Plaza sutinïxarakiwa, ukanw mama Ruizax arsuwiyi. Tata Mesax yaqha markanakanjam jan walt’äwinak utjañap muni, neoliberal amtamp irptapk uka markanakanjama, kunjams Gonzalo Sánchez de Lozadamp irptkasax Altu Patan jaq jiwarayawiyapxäna ukw amtawiyi, 67 jiwatamp 400 usuchjatamp utjawayki uka.

Transmisión de Resultados Electorales Preliminares (TREP) ukan jaqüw jakhthapitax uñstki ukx janiw iyawsiskäti sasaw Carlos Mesax sawiyi, uka jakhthapitanx Evo Morales Jilïr Irpiriw nayrïr jaqüwin atipirjam uñstaraki, jupax Movimiento al Socialismo (MAS) p’iqichirirakiwa.

“100% jaqüwpach TREP ukan jakhthapitatx jan payïr jaqüwin munasitap qhanpach amuyatäni” sasaw wasürux tata Mesax arsuwiyi, jupax janir jakhthapitäki uka jaqüwinakanx niya 70% jaqüwiw jisk’a markanakankiri sawiyiwa, uka jisk’a markanakanx MAS ukatakiw jaquñ yatipxi, kamisti Chijjllayañ Utankirinakax yatiyapki ukas kipkaki.

TREP ukanx jakhthapitax mayamp uñt’ayasiwayxiwa, tata Moralesaw sapa patakatx tunkamp atipaski, ukhamarus tata Mesax janiw ukax walïkiti sasaw sawiyi.

Ukhamïpanx, tata Mesax sartasiñ mayiwiyi, kunayman departamentonw jan chhijllayañ utanakanx jan walt’áwinakax utjawiyi, P’utuxsinx yamas utpach phichhantawiyapxi.

Chukiyawunx, jach’unakaw Real Plaza qurpachañ uta jak’anx jan ch’axwapxañapatak uñjawiyapxi, Mesan arkirinakapamp MAS ukankirinakampiw uka chiqanx jikxatasisipkäna, jisk’a markanakan jaqut yäqasiñap jupanakax mayiwiyapxi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156