Irpirinakaruw ch'amamp jaqsuñ munasipki, markachirinakamp markas apnaqañ arxatañäni sawiyiwa

Imagen

Evo Morales Jilïr Irpirix Marka Jach'a Utanw yatiyirinakamp aruskipt'aski (Jamuqa: UCP)

Irpirinakaruw jaqsuñ munasipki sasaw jichhürux Evo Morales Jilïr Irpirix arsuwiyi. Markachirinakamp markas apnaqañ utjaskañapakik jan ch’axwas arxatasiñäni sasaw markachirinakar sawiyi.

“Bolivia markampir uraqpachankirinakampiruw yatiyañ muntha, irpirinakaruw ch’amamp jaqsuñ munasipki. Irpirinakar ch’amamp jaqsuñatakix irpirinakar k’umirinakax anqa markanakankiriankamp yanapayasisaw wakichasiwiyapxi” sasaw tata Moralesax arsuwiyi.

Sartasirinakax janiw jaqüwinak jakhthapiyapkiti, marka utanakw phichhantasipki, departamento chhijllayañ utanak tunthapisipki ukhamarak jaqüw mayiñ utanaksa, ukhamw irpirinakarux ch’amamp jaqsuñ munasipki sasaw qhanancht’awiyi.

“Qamirinakat arxatasirinakax yaqha Jilïr Irpirw aka urunakax utt’ayañ munapxi. Janiw nayrjan yaqha markanakamp apnaqayasiñ pachankxtanti, janiw Jilïr Irpirinak utt’ayañatakix monarquíamp sarnaqañ pachankktansa” sasaw llakt’at arsuwiyi.

Jichhakamax janiw ch’axwañ munapki jupanakampix ch’axwatäkiti sasaw Jilïr Irpirix qhanancht’awiyi.

“Janiw ch’axwktanti, janiw ukham lurkañäniti, ukhamarus Bolivia markaruw akham sañ muntha: wakicht’asipxañäni, jan ch’axwas Tayka Kamachirjam markachirinakamp markas apnaqaskañatakik sartasiñäni” sasaw arsuwiyi.

Markachirinakamp markas apnaqasiskañapakik wakicht’asiñäni sawiyiwa.

“Tamacht’asit markachirinaka, qhuyan irnaqirinaka, yapuchirinaka, markat arxatasir yatxatatanakaw markachirinakamp marka apnaqasiñap mayamp utjañapatakix sartasiwiyapxi. Bolivia markachirinakax walja kutiw aka pachpan ñanqhachat uñstawiyapxi, anqa markankirinakas ñanqhachawiyapxiwa, jichhast 20 mara palla pallanakamp apnaqayasitata, chhijllayasirinakpurak kuns amtasipxatapatx (qamirinakat arxatasirinakax) janiw chhijlläwin jakhthapitx yäqañ munapkiti” sasaw jupa tata irpirix arsuwiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156