Tata Evox OEAnkirinakax Bolivia Tayka Kamach yäqas jaqüwinakx uñakipapxpan sawiyiwa

Imagen

Evo Morales Jilïr Irpirix Marka Jach'a Utanw yatiyirinakamp aruskipt'aski (Jamuqa: UCP)

Evo Morales Jilïr Irpirix Organización de Estados Americanos (OEA) ukankirinakaruw chhijlläw jaqüwinak uñakipapxañapatak jawillt’awiyi, ukhamarus Tayka Kamach yäqasaw uñakipasiñapa sawiyiwa.

OEAt chhijlläwir khithanitanakax payïr jaqüwix utjpan sasaw sawiyqapxi, ukatw ukham irpirisax arsuwiyaraki.

“Mayamp jawillt’añ muntha. Kawkitsay jutapxpan, uñakipapxpan (…), ukhamarus kuna amuyumpisay jutapxpan, Tayka Kamachis yäqapxañapa” sasaw Jilïr Irpirix arsuwiyi.

OEAt khithanitanakan arsutapax llikanw khuri walür ch’iqiyasiwiyi, ukhamarus jichhakamax janiw Markaspachan Chhijllayir Jach’a Utanx jakhthapiñ tukuyawiyapkiti.

“Janiw jupanakan arsutapx ukhamaw siskiristti. Janir jakhthapiñ tutuyapkipanw arsxasipki. OEAt jutatanakax irpirinakar jaqsuyañ inas munasipkchi sasins sañjamawa” sasaw tata Moralesax arsuwiyi.

OEAnkirinakax akar jutapki jupanakan irnaqatapat amuykipt’apxaspa ukax walïspawa, janir jakhthapiñ tukuyapkipanw kunayman amuyunak arsxasipki sawiyiwa.

“Aliqat atipayatawa sasipkiwa. Aliqat atipayatx sum uñt’atapxpan. Irpirinakar kimsaqallq k’umirinakaw aliqat atipayapxi sasin sawiyapxi. Sum yatiyapxpan. Ukw uñjañ munapxtha” sasaw jupa tata irpirix arsuwiyi.

El Movimiento al Socialismonkirinakax (MAS) jakhthapiñ tukuyapxañap suyasipki, ukhamarus jisk’a markanakatx jichhakiw jakhthapisipki, ukampix juk’amp jaqüwix nänakatak jilxattan sawiyiwa.

Taqpach chhijlläwit Markaspachan Chijllayañ Utankirinakarux yatiyäw mayïxa sasaw Jilïr Irpirix arsuwiyi.

“Ukham lurapxañapa, janiw irpirinakampikixa jan ukax markasampi, anqa markankirinakampi” sawiyiwa./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156