Suman jakañampitak walja markanakan p'iqicht'at sartañatakiw Boliviax EuroLat tantachäwinkirinakar katuqaski

Imagen

EuroLat tantachäwix Santa Cruzan luratäski / Jamuqa: Anqa Markanakamp Aruskipañ Kamanan uñt'ayata

Evo Morales Jilïr Irpirix Iwrupa Markanakampin Awiya Yala markanakampin (EuroLat) tantachäwip qalltayapkani ukankawiyiw jichhüruxa. Jichhapiniw uka tantachäwix markasan luratäski. Suman jakañampitak walja markan p’iqicht’at sarantañampitakiw aruskipapxani. Anchhax Venezuelarux palla pallanakamp mantañ munasipki, ukatw ukham amuyump tantachasipxatapax wali wakiskiri.

9:00 arumirjäkipanw uka tantachäwx Sirionó sutin utan qalltayawiyapxi, Fexpocruzana, Santa Cruz jach’a markana. Tata Ramón Jaureguiw tantachäwx irptani, jupaw EuroLat tantachäwx yaqhamp chik irpti.

Jupax markachirinakat arxatasir Iwrupa kamach luririwa, “Iwrupamp Awiya Yalamp juk’amp sum apasipxañapatakiw ch’amacht’atäni. Kunjams walja markan p’iqicht’at sarantatäspa ukxata, Pachan mayjt’äwipata, jaqir jaqjam uñjañxata, yaqha markanakamp alakipasiñxata, ukhamanakata” sasaw sawiyi.

Bolivianx walja markan p’iqicht’at sartaña amuyux ch’amachatawa. Marka irpirinakax sumäñat apasiñatakiw ch’amachapxi ukhamarakiw phuqhacht’asis yanapasiñsa.

Venezuelan jan walt’ayasiñax utjki ukampix “Thayt’at Ch’axwa” sasin uñt’atäki ukaw mayamp uñstawiyasmachi sasaw walja amuykipt’irinakax arsuwiyapxi, Estados Unidow Rusiamp Chinamp ukanx uñthapisiski, uka markankirinakax janiw palla pallanakamp Venezuelar mantasiñap munapkiti, Boliviax uka pachprak arsu.

“Awiya Yalanx janiw ch’axwax utjkiti sasaw amuyux uñt’ayatäni. Janiw palla pallanakamp yaqha markar mantañax utjkiti, Awya Yalankirinakax jiwaspachaw jan walt’äwinakas askichasiñasa, jichhax Venezuelankirinakaw askichasipxañapa. Uka amuyuw uñt’ayañ munata” sasaw tata Daniel Caggianix ABI ukankirinakar sawiyi, jupax MERCOSUR kamach luririnakan irpiriparakiwa.

Eurolat ukanx 150 tantachasiriw utji; PARLATINO (Parlamento Latinoamericano), PARLANDINO (Parlamento Andino), PARLACEN (Parlamento Centroamericano) PARLASUR ukankirinakaw ukan jikxatasipxi.

“Kamach luririnakax janiw markachirinakan arupak uñt’ayapkiti, Iwrupampin Awiya Yalampin utjki uka jan walt’äwinak aruskipas askichañatakiw irnaqapxañapa, jan ch’axwasa, juk’ampis jan Awiya Yalampin Iwrupampin palla pallanakamp mantañ utjañapataki” sasaw tata Caggianix arsuwiyi.

Eurolat tantachäwinx kunas jichhakam lurawiyata ukxat amuykipt’apxani, akat qhiparux kunas luratäni uks amtawiyapxarakiniwa. Awiya Yalatuqutx Elías Castillo jupaw uka tantachäwx irptarakini.

Tantachäw qalltayatatx tantachäw irptirinakaw jikist’apxani ukhamarakiw marka apnaqañampit jan walinakat tuwaqasiñampit jaqir jaqjam uñjañampit aruskipirinakas tantachasipxani.

Tantachäw tukuyatatx, paypach irpirix amtanak uñt’ayapxani.

“Iwrupampin Awiya Yalampin tantachäwipar purinipkta taqi jumanakaruw katuqt’apxma, EuroLat ukaru, jumanakaw Santa Cruzarux aksa jan walt’äwinakampit uraqpach jan walt’äwinakampit aruskipañatak purinipxta. Markajax, CELAC irpirjamax, taqi chuymaw katuqt’apxtam” sasaw Bolivia irpirix Twitteran qillqt’awiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156