Evo Morales Jilïr Irpirix Inak Qullañ Wakichäw Sarantayañ Kamach rixt'awiyi

Imagen

2.000 waranq waranq dolarat jilaw Inak Qullañ Wakichäw sartayañatakix utji, 1.200 usunakxat qullañaw utjani / Jamuqa: K'umar Jakañ Kamanan uñt'ayata

Evo Morales Jilïr Irpirix 1152 jakhun kamachw Inak Qullañ Wakichäw sartayañatak jichhürux Marka jach’a Utan rixt’awiyi. Uka kamachirjamax marka apnaqirinakaw markachirinakan k’umar jakañapx mun jan mun uñjapxañapa, amtanakx k’umar jakañatak uñt’ayapxañapawa, taqinin sum jakapxañap uñjapxañapa, inakiw qullayasiñas utjañapa.

“Wiñayatakiw aka urux amtasiñatakjamäni, Bolivia markan mayacht’asitapat akham wakiskir sarttan, jakäw mayjt’ayir amta utjatapata (…). 180 maranx, 17.175 irnaqirikiw (qullañatak) utjäna. 13 maranx, 18.550 yaqha irnaqiriw Bolivianx qullañatak katuqata, jichhax 8.000 yaqha irnaqirimpix 26.550 ukja irnaqirïniw Bolivianx qullañatak utjani” sasaw yatiyawiyi.

Qhipa 13 maranx, 1.061 machaq qullañ utaw utji, 2005 maranx 52 dolaraw sapa markachiritak utjäna, jichhax 284 dolaräxarakiwa. Machaq kamachimpix Marka Qullqitw irnaqirinakatakis qullañ amtanakatakis apsutäni ukhamarakiw yänakatakis qullanakatakisa, tantiy qullañ utanakampitak jach’a qulla utanakampitakiw churapxani.

“Nänakatakix k’umar jakañax jakäw pachpawa. Neoliberal amuyuninakatakix qullañax qullqichasiñatakïnwa (…) 200 waranq waranq dolaraw k’umar jakañatakix utjistu. Yamakis 54 qullañ utaw utahcayatäni, 1.934 waranq waranq dolaraw ukatakix utji” sawiyiwa.

Gabriela Montaño, k’umar Jakañ Uñjir Kamanax arsuwiyarakiwa. Inak Qullañ Wakichäw rixt’asax “kuna markan lurañ munapki ukax phuqhasxiwa (…) taqiniw qullayasiñäni”, taqi Bolivia utjäwitakiw inak qullañax utjani, “janipiniw qullayasiñatakix Bolivia markachirinakax waxt’asksnas ukham qullayasiñ mayiskañäniti”, sasaw sawiyi.

“Jichhapiniw marka irpirinakx taqi jach’a qulañ utanakan qullayañx apnaqapxani (…) juk’amp ch’amawa, juk’amp qullqiw munasi, ukhamarus apnaqapxäwa” sawiyiwa

Jichhür yanapatanakx markachirinakaw katuqxapxi, “yänakas kutkatayasiwayxtan” ukatrak ukhamanakax utji, “Evo Morales Jilïr Irpirin 13 mara apnaqatapanx qullañx mayjt’ayawiyiwa” sawiyiwa.

Bolivia markachirinakatakix amtaskañâniwa, “nayra achachil awichanakasax munapkän ukaw phuqhasiski. Jupanakarux janiw qullatäkänti. Marka tamanakan mayacht’asipxatapampix Inak QullañWakichäw uñstayawaytan, Evo Morales jilataw Qullasuyu Marka Jach’a Irpirjamax sayt’awiyaraki” sasaw mama Filomena Carrascox arsuwiyi, jupax Bolivia aljirinakan irpiriparakiwa.

Jilïr Irpirix “Qullirinakampir usut uñjirinakampirux yäqapxtwa. Suma jakañ munir qullirinakax akankasipkiwa. Kunayman jupanakarux siristha, jupanakax janiw markasarux jaytjapkiti, janiw qullayasiñ munapki jupanakarusa (…) Aka kamach k’umirinakax jaqin jiwañap munapxi, usuntañap munapxi,jan jiskht’asiñatakis qullinïpki jupanakar aynacht’ayañ munapxi” sasaw arsuwiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156