Tunka maranx pä waranq waranq markachirit jilaruw Juana Azurduy Paylläwimpix yanapt'awiyata

Imagen

Evo Morales Jilïr Irpirix Juana Azurduy Paylläw utt'ayat Chukiyawun amtaski (Jamuqa: UCP)

Evo Morales Jilïr Irpirix Juana Azurduy Paylläw tunka mara utt’ayat jichhürux amtawiyi, kunjams uka paylläwimpix jan taykanakan jiwapxañapatak ukhamarak phisqha maranit sullakanakar manq’atuqut ch’amachasiwiyi ukxats arsuwiyarakiwa.

Qhipa tunka maranx 1.001.975 wawan warmimpir 1.262.960 wawampiruw aka paylläwimpix yanapt’awiyata sasaw Gabriela Montañox arsuwiyi, jupax K’umar Jakañ Uñjir Kamanarakiwa.

Juana Azurduy Paylläwimpix 90% warmiw Bolivianx qullirimp usupkipan uñjayata, ukhamatw warminakamp wawanakapampix jan jiwañar purt’asiwiyapkiti sasaw arsuwiyi.

“Irnaqañ Amtanak Wakichir Kamanamp Qullqichäw Uñjir Kamanampix aka paylläw churañatak aruskipkasax nayrïr tunka maranx juchhikiwiyapxiwa. Jichhax yanapatax amuyasxiwa, ukhamarus sumaptayaskañakiwa” sasaw tata Moralesax arsuwiyi.

Juana Azurduy Paylläwix khithinakati qullirimp janir uskas, uskas ukhamarak usuqatat uñjayasipki jupanakar churatawa. Pä maranit sullka wawanakax 12 kuti sapa pä phaxsi uñjayasipki jupanakatakis payllatarakiwa. Jan seguronïpki jupanakar churatawa.

Markas apnaqir mantawiyapktha ukjatpachx, juk’ampiw warminakar yanapañatakix irnaqatäxi sasaw Jilïr Irpirix sawiyi.

“Kamach luririnak taypinx, 51% warmiw utji. Taripirinak taypinx 46% ukjarakiwa. Uraqitx 45.6% warmiruw titulunakax churata” sasaw qhanancht’awiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156