35 "juk'uchasir" qutuw Llallawampin Wanunimpin utji sasaw Qhuyanak Uñjir Kamanax arsuwiyi

Imagen

35 "juk'uchasir" qutuw P'utuxsimpin Uru Urumpin utji / Jamuqa: Eju TV

35 qhuya lunthatanakaw Llallawampin (P’utuxsi) Wanunimpin Katar Q’awampin (Uru Uru) utji sasaw tata César Navarrox wasärmax arsuwiyi, jupax Qhuyanak Uñjir Kamanarakiwa. Wanunin qhuya lunthatanakax palla pallanakar jan walt’ayawiyapki ukat arskasaw ukham jupax sawiyi, wasärmaw niyapin Wanuni qhuyx lunthatawiyapxi, pusi jiwataw utji.

“Llallawanx tunkaw uñt’ata, Wanuninx pä tunka, Katar Q’awanrak phisqha. Kimsa tunk phisqhanïspawa” sasaw Bolivia TV ukanx arsuwiyi.

20 suma utt’ayat juk’uchasir tamw uñaqirinakax jikxatawiyapxi, jupanakax Wanunimpin Llallawampin Katar Q’awampin jikxatasipxi sasaw tata Navarrox yatiyawiyi.

Llallawanx aka juk’uchasir tamanakaw utji: "Loros", Teo Janq’u, Vikos, Qaqas, Timukus, Matanzas, Chocó Belén, Teofilos, Gatos, Tubos, sapa qutunx 20 jan ukax 30 jaqiw utji sasaw yatiyawiyi.

“Wanuninx yaqha juk’uchasir qutunakax akanakawa: Jarros, Yetis, Lechis, Motas, Francos Oruro, Galletas, Gudis, Chentavos, Qhachis, Mostasos, Marihuanos, Ch'apis, Loros, Timukus, Ángeles, Los Ismael, Los Dennis, Lototiquimes, Wayrayos” sasaw qhanancht’awiyi.

Katar Q’awanx Los Richard, Camba, K'usis, Gudis, Q’ulus ukanakaw jikxatasipxi sasaw tata Navarrox yatiyawiyi.

“Uka qutunakax janiw lunthatapkakiti jan ukax qhuyalanakw apthapipxi, Llallawampin Uru Urumpin aljapxi” sasaw arsuwiyi.

Uka pachparakiw, khithinakas uka qhuyalanakax alapxi ukanakatx yatxatawiyata; Uru Urunx tunka kimsan (13) utaw utji, uka chiqanakanw juk’uchasirinakatx alapxi; Llallawanx phiqhawa; Wayra Patanx paya, Katar Q’awanrak maya sasaw qhanancht’awiyi.

Jutir urunakax uka alirinakarux taripayatäniwa, jupanakax uka jan walinaka “imxatirïpxiwa” sasaw Qhuyanak Uñjir Kamanax arsuwiyi.

“Qhuya lunthatanakax pisin jakasirïpxiwa, qullqiniptapk ukanakax janiw lunthatapki jupanakäpkiti, alakipirinakawa. Ukatw qhuyalanak lunthatañ ch’amachapki jupanakar juchachayatäni. Ukax wali wakiskirïniwa, mutuñ utarus mantapxaspawa” sasaw sawiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156