Kunjams Bolivian jan wali qullanak apnaqirinakarux kutjayata ukxat Vienan yatiyasiwiyi

Imagen

Tata Moralesax kunjams Bolivianx kuka laphix apnaqata, kunjams jan wali qullanak apnaqirinakar kutjayata ukxatw arsuwiyi / Jamuqa: BTV

Evo Morales Jilïr Irpirix kunjams Bolivianx jan wali qullanak apnaqirinakar kutjayata ukxatw Viena jach’a markan yatiyawiyi. ONUn jan wali qullanak apnaqirinakar kutjayirinakapaw 62ïr tantachäwip lurawiyapxi, ukankawiyiwa.

“Amtanakajax markachirinakamp chik jan wali qullanak apnaqirinakar kutjayañawa, jaqirjam uñjañ yäqasa, kukamp qullqichäw jiltayasa. Anqa markanakanx ukx yatxapxiwa, jan wali qullanak apnaqirinakarux kunjamax khuspin kutjayata ukxata” sasaw tantachasirinakar sawiyi.

2006 maranx janiw nayra kuka apnaqañx yäqapkänti, juchachapxänwa, jan wal uñjatänwa sawiyiwa. Marka apnaqirinakax kuka yapuchirinakaruw jan walt’ayapxäna sawiyiwa.

Uka pachparakiw, 1008 Kamachimpiw Estados Unidox apnaqapxitäna, jupanakax chhijlläwinakamp kamach lurañamp jach’unakamp apnaqapxäna sasaw sawiyi. “Kuka juchachañamp anqa markat apanit amtanak phuqhayatampiw qullqichäw aynacht’ayawiyi, markachirinakar jan walt’ayawiyi, saräws ukhamaraki, kuka yapuchirinak taypin Bolivia markachirinak taypin ukham jan walt’ayawiyi” sawiyiwa.

2004 maranx sinti ch’axwañaw utjäna, kuka yapuchirinakw jiwawiyapxi, ukatw kuka yapuchirinakax mä katu kukx yapuchañ mayiwiyapxi, 1.600 m2 uraqxar yapuchaña sasaw arsuwiyi.

2004 maran ch’axwatatw amtanakajamp sarantañ amtawiyapxtha sasaw sawiyi. Kuka laphix Tayka Kamachin arxatatäxiwa, ukhamat Bolivia saräwix yäqataraki sawiyiwa.

Anqa markanakan utjki uka amtanakax markajan phuqhatarakiwa, markachirinakamp chikaw jilt’ir kukax jik’irata, ukham lurañatakix aruskipt’atawa, mä amtaruw purita, jaqirjamaw yapuchirinakar uñjata sasaw qhanancht’awiyi.

“Nayrïr 13 maranx, suni uraqinx 20% ukjaw Bolivian kukax utjäna, jichhax 10% ukjakïxiwa. Ukaw amtanakajan khusätapx amuyt’ayarakistu” sawiyiwa.

Ukhamarus, Estados Unidompin yaqha markanakampinx jan wali qullanak apnaqirinakar katjañatak arknaqañax wakisirakiwa, jan kutjayirinakar mutuyañ amtaspan sasaw tantachasirinakar arxayawiyi.

Uka pachparakiw, lurañanakax utjaskakiwa, “jan wali qullanak apnaqirinakaruw kutjayasipktha sasin sapki ukax” Estados Unidon jan yäpar sarantatapak uñt’ayi sasaw sawiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156