60% yatichiriw markasanx warmïpxi

Imagen

Yatichir kullaka (Jamuqa: Llikat apsuta)

Markasanx warminakaw yatichirinak taypin jiläpxi, sapa patakatx suxta tunkaniw (60%) warmïpxi. Jichürux Yatichirin Urupaw amtata, ukatw ukham qhanancht’ataraki.

“Markasanx yatichirinakar yanapt’añ amtanakax utjistu ukatw yatichirinakax jilxattawiyi. 102.303 yatichir warminakaw utji, 66.329 yatichiriw chachäpxaraki” sasaw Yatichañ Kamana Utankirinakax yatiyawiyapxaraki.

168.631 yatichiriw markaspachan utji. Jupanak taypitx 47.566 yatichiriw Chukiyawun jikxatasipxi, 35.573 Santa Cruzana, 28.521 Qucha Pampana, 16.402 P’utuxsina, 10.792 Chuqi Chakana, 9.610 Uru Uruna, 8.843 Tarijana, 8.918 Benina, 2.406 Pandona. Jupanakaw Bolivia markachirinakarux yaticht’apxi.

2006 marat 2019 marakamax, marka irpirinakax 46.000 machaq yatichirinakw irnaqapxañapatak katuqt’awiyapxi.

Bautista Saavedrax markas apnaqkän ukjaw mä kamach utt’ayawiyapxäna, 1924 maran llamayu phaxsi saraqkipana. Sapa mara t’aqa phaxsit 6 uru saraqkipanw Bolivia Yatichirinakan Urupax amtatäni sasaw amtawiyapxäna./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156