Uraqpachankir irpirinakaw Bolivian jan irpirinakar jaqsupxañapx mayisipki

Imagen

Sartasirinakax markachirinakaruw usuchjasipki (Jamuqa: Llika)

Qhipa urunakanx, Bolivianx jan walt’ayirinakaw utjawiyi, ukham uñjasaw uraqpachanx irpirinakar jaqsuñ amtanak jan utjañapatak arsuwiyapxi, Evo Morales Jilïr Irpiriruw ch’amacht’awiyapxi, jupax nayrïr phaxsiw 20 urükipan chhijlläwin atipawiyi.

Twitteranx tata Manuel Zelayaw arsuwiyi, jupax “jan walinak (irpirinakar jaqsuña) janchi uñaqas jisk’achirinakan, anqa markanakamp apnaqayasirinakan, q’irwjirinakan lurapxatap k’umtha, jupanakax Bolivia markaruw jan walt’ayañ munapxi, markachirinakax chhijlläwin Aymara Jilïr Irpiritak waljan jaquwiyapxi” sasaw qillqt’awiyi.

Mama Piedad Córdovax arsuwiyarakikiwa, Awiya Yala Mayacht’at Markanakan Tamapankirinakax jaqüwinak uñakipasipki ukaw wakisi sasaw sawiyi, jupax Poder Ciudadano Siglo XXI tama irpirirakiwa.

“Bolivian qamarinakat sinti arxatasirinakax jichhax irpirinakaruw jaqsu munasipki. Taqi Colombian amuyt’irinakaruw jawillt’tha, Boliviar arxatañäni” sasaw mama Córdobax llikan sawiyi.

Uka pachparakiw Chilinx Movimiento del Socialismo Allendistankirinakax Bolivian jan walinakax utjawayki ukxat arsuwiyapxi, “Evo Morales Ayma Jilïr Irpirirux ch’amamp jaqsuñ munasipki” sawiyiwa, “Awiya Yala markanakax ukham ch’amamp irpirinakar jaqsuñ munapxatap k’umiñâni, yatiyañäni” sasaw arsuwiyapxi.

Uka pachparakiw, Estados Unidonx Ben Nortonax arsuwiyi ukhamarakiw Ernesto Samperamp Angela Lerenampisa, jupanakax irpirinakar k’umirinakan jan wali luratanakap k’umiwiyapxi, markachirinakan irpirinakatak amtapxatap phuqhaspan sawiyapxiwa./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156