Morales Jilïr Irpirix 5527 Willka Kutw Tiwanakun katuqt'awiyi

Imagen

Jamuqa: BTV

Evo Morales Jilïr Irpirix 5527 Willka Kutw Qala Saya Saya Pachamamar luqtas katuqt’awiyi, Tiwanakuna. Jupamp chikax mama Wilma Alanocamp, Saräwinak Uñjir Kamana, tata Diego Parympiw, Anqa Markanakamp Aruskipir Kamana, ukankawiyapxi.

Willka Kutx ONUnkirinakaw uraqpachan amtatäñapatak jaysawiyapxi sasaw Jilïr Irpirix arskasax qhanancht’awiyi.

“Sunin, Ch’umi Uraqin, Chaco uraqin amtat machaq marwa amtasktan. Awiya Yalan jan khithin apnaqat markanakan nayra saräwipa. Jichhax ONUw Uraqpachan Amtañ Willka Kutjam amtañ jaysawayxi. Machaq marampix Bolivia munat markasan iyawsäwipas ch’amachasiwa” sasaw Jilïr Irpirix Twitteran arsuwiyi.

Willka Kutix sapa mara t’aqa phaxsit 21 uru saraqkipanw wali munañan chiqanakan amtata. Willka Kuti, Inti Raymi, Mara T’aqa ukham sutinakampiw uñt’apxi. Pachamamarux musq’anakamp kupalamp insinsump panqaramp untump sullump k’isimir laq’amp kukampiw luqtata. Lawanak pataruw apxatata, ukatx ninarakiw katuqt’asiñapatak luqtata.

5527 Mara T’aqax 223 chiqanw Bolivianx katuqt’ata, walja markachiriw ampar luqtas Willka Tatar katuqapxaraki./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156