Bolivia markax 5527 Willka Kutwa katuqawiyi, ONUx Willka Kuti amtañw ch'amacht'awiyaraki

Imagen

Jamuqa: La Razón

223 chiqanw markachirinakax jikthaptapxi, ukanw jupanakax Pachamamar luqtasipki. Wasürux Mayacht’at Markanakan Tamapankirinakax (ONU) uraqpachan Willka Kuti yäqañ amtawiyapxi.

Evo Morales Jilïr Irpirix yaqha irpirinakamp chikaw Tiwanakur wali alwat puriwiyi, Qala Saya Sayanw jupax Mara T’aqx katuqt’awiyi.

Aka marax Willka Kutix juk’amp kusisitaw amtata, Mayacht’at Markanakan Tamapan (ONU) tantachäwipanw wasürux mara t’aqa phaxsit 21 uru saraqkipanx uraqpachanw Willka Kutitx amtasiñapa sasin amtawiyapxi ukata, “aka taman jikxatsipki uka markanakax Willka Kuti amtañ kunayman amuyump uñt’ayapxpan; Inti Raymi, We Tripantu, Willka Kuti, Yasitata Guasú ukanaka, sapa marax ukanak amtañatak jikthaptäwinak wakt’ayapxpan” sasaw sawiyapxi.

Wasürux Evo Morales Jilïr Irpirix taqpach markaruw ukham amtapxatapat jallallt’awiyi.

“ONUn jikxatasipki uka markanakaruw jallallt’apxtha, Bolivian mayitap ch’amachapxatapata, mara t’aqa phaxsit 21 urükipan Willka Kuti amtañataki, juk’ampis Chilimpir Pirwampir Ecuadorampiru, chikt’ataw irnaqawiyapxtha. Saräwisax uraqpachan uñt’atawa” sasaw Twitter janjapan qillqt’awiyi.

2009 maranw mara t’aqa phaxsit 17 uru saraqkipan Jilïr Irpirix 173 jisk’a kamach utt’ayawiyi, ukarjamarakiw jichhürux Mara T’aqax amtatäski./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156