Bolivianx wali khust'at arunakax ch'amachata sasaw UNESCO uksankirinakax sawiyapxi

Imagen

Audrey Azoulay, UNESCO irpirix Boliviaruw ch'amacht'awiyi / Jamuqa: Prensa Latina

Mama Audrey Azoulayax Boliviax arunakapx khus ch’amachi, nayra arunak Tayka Kamachipan arxati, markpachan apnaqasiñapatakiw yäqi sasaw arsuwiyi, jupax Organización de las Naciones Unidas para la Educación, la Ciencia y la Cultura (UNESCO) irpirirakiwa.   

“Janiw taqi tayka arunakax, janiw jisk’achat arunakax mä markanx ukham arxatatäkiti, janiw yatichañatak apnaqatäkiti”, “jan ukham lurataw tayka arunakax aynacht’i, yamakis jayjpachatx chhaqhtañ yatipxi” sasaw mama Azoulayax arsuwiyi.

“Bolivianx 37 arunakaw marka arunakjam yäqata. Boliviax kunayman arunakamp sarantañatakiw ch’amachañ p’iqicht’aski, tayka arut yatichañatakiw ch’amacht’aski, ukax amtanak phuqhañatakis jan sayt’as (mä markan) jiltañapatakix wakiskirirakiwa” sasaw UNESCO irpirix sawiyi.

Bolivianx aka arunakaw utji: aymara, araona, baure, bésiro, canichana, cavineño, cayubaba, chácobo, chimán, ese ejja, guaraní, guarasu’we, guarayu, itonama, leco, machajuyai-kallawaya, machineri, maropa, mojeño-trinitario, mojeño-ignaciano, moré, mosetén, movima, pacawara, puquina, qhichwa, sirionó, tacana, tapiete, toromona, uru-chipaya, weenhayek, yaminawa, yuki, yuracaré, zamuco.

Uka pachparakiw, 7.000 arunakaw uraqpachan utji, niya chikataw chhaqhtañampi. Aka patak mara tukuskan ukjax 90% aruw jan utjxaspati.

Ukhamïpanx, Bolivian arunak ch’amachatap jach’acht’awiyi ukhamarakiw Tayka Kamachisan arunak arxatatassa. 2009 maran anata phaxsit 07 uru saraqkipanw Evo Morales Jilïr Irpirix Tayka Kamach rixt’awiyi, ukanx 36 markanakaruw arunakapamp chiq yäqawiyata.

Uka pachparakiw, marka irpirinakamp departamento irpirinakampix pä arut arst’asiñ yatipxañapa; kastill arut arsusispa, yaqhast kawkïr aruti jakki ukan arsuski ukarakiw arsutäñapa.

UNESCOn ukham arsupxatapatx, Evo Morales Jilïr Irpirix Twitter uksanw jallallt’awiyi, “Boliviax arunak arxatañ p’iqicht’i. Suman jakañamp kankañasamp yatiñasamp saräwisampix arunakasan jikxatasi” sawiyiwa./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156