Villa Tunarin jaq jiwarayawiyapkän ukan 31 mara phuqhasitap amtawiyapxi

Imagen

Kuka yapuchirinakax palla pallanakaruw saykatasipki (Jamuqa: BolTA)

31 maraw mäkhipawayxi, Unidad Móvil de Patrullaje Rural (UMOPAR) ukankirinakax kuka yapuchirinakar Qucha Pampan illapt’awiyapkäna ukjatpachxa, Estados Unidot khithanit jaqinakaw ukham lurañ p’ichicht’awiyapxäna. Jichhax markachirinakan p’iqichirinakapax ukw amtasipki.

“Jan khuyapt’ayasisaw UMOPARankirinakax jikxatasipkän uka chiqat mistuwiyapxi, tantachasiñ utaj jak’ata, ukatx illapt’añ qalltawiyapxi. Taqiniw jalsuwiyapxtha, yaqhipax chakatw jan jiwañatak thuqhuqawiyapxi” sasaw mama Leonilda Zuritax jichhür amtawiyi, jupax Chapare ch’umi uraqin suxta tamap utt’ayirirakiwa.

Walja yapuchirinakaruw illapt’as jiwayawiyapxäna ukhamarakiw umar thuqhuntayasasa. Mä warmin jiwatapatx janiw kunjamats jiwi ukax yatiskiti. Waljanirakiw chhaqharawiyapxi. Ukhamw Villa Tunarinx 1988 maranx mara t’aqa phaxsit 27 uru saraqkipanx jaqx jiwarayawiyapxäna.

Víctor Paz Estenssorox Vietnaman apnaqat ñanqhachir qullanakamp kuka chhaqhtayañ munäna ukatw yapuchirinakax sayt’asisipkäna, Estados Unidonkirinakaw ukham lurañx amtayapxarakïna.

Ukhamarus, ukham luratax janiw kuka yapuchirinakarux ch’am jiwt’ayawaykiti. Irpirinakapax juk’amp ch’amampiw kuka laphi arxatañatakix sarantawiyapxi, Boliviar yäqayañatakiw ukham sartasiwiyapxäna.

“Ukjataq kuka laphi arxatirinak jiwarayir uñjasax juk’amp amuyt’asipxtha, irnaqapxtha, jichhax anqa markanakanw kukax nayratpach apnaqat laphjam uñt’atäxi, ukhamarus markasas jiwasatakjam apnaqatäxarakiwa, anqa markankirinakaw apnaqapxäna” sasaw jupa mama irpirix arsuwiyi./RAR


Warning: mysql_num_rows() expects parameter 1 to be resource, boolean given in /var/www/html/aymara/otro.php on line 156