Buscar

SARNAQÄWI

1969 MARAT 1985 MARAKAMA

Televisión Boliviana ukax 1969 maran llumpaqa phaxsit 30 urunak saraqkipanw uñstawiyi, uka pachax Luis Adolfo Siles Salinas Jilïr Irpiriw ukhamäñapatak mä kamach amtawiyäna, jupax Gral. René Barrientos Ortuño jiwatatwa marka apnaqir mantawiyarakïna.

Tito Landa jupaw uñch’ukiñanak taypinx nayraqat uñstawiyäna, jupaw Televisión Boliviana 7ür Kanalxa Boliviankirinakar uñt’ayawiyäna. Irnaqirinak taypinx yaqhip anqa markankirinakaw jikxatasipxarakïna, jupanak taypinx Mario Struker jupaw jikxatasirakïna ukhamarakiw uñacht’ayañ-ist’ayañ sartayir yaqha uñt’at jaqinakas ukankapxarakïna.

Uka pachax, uñch’ukiñ yänakanipkän jupanakax janq’ump ch’iyarampikwa uñjapxäna. Anqa markat jutir yatiyäwinakax teletipo uksatuqiw katuqatäna, uka yatiyäwinakax DPA yatiyir utat katuqatarakïnwa, ukampirus janiw ukax jank’äkarakïnti, Boliviankirinakax yatiyäwinak pä uru qhipt’atwa uñt’apxarakïna, ukjatakix urapchanx luräwinakax mäkhipxarakïnwa.

Uka pachax, Altu Patampitak Santa Cruz de la Sierrampitak pachpa pachar uñacht’äwinak apsutakän ukjax, pä departamentunakas mayachthapitäkaspa ukhamarakïnwa, ukast wali muspharkayarakïnwa.

Paqallq tunka maranak purinxipanx, Televisión Bolivianax jupa pachpaw wakichäwinak wakt’ayañ qalltxarakïna, markasan yaqha chiqanakar puriñataki. Mabel Rivera, “El Arlequín” jakäw yatxapayir tama irpirix, wawanakatakiw mä wakicht’äw uñstayäna, ukansti sapa paqallq uruw Blanca Nieves, Caperucita Roja ukham yaqha sarnaqäwinakamp uñt’ayarakïna. Kimsa tunka k’ata wakicht’äw utjañapatakix, 50 yanapir jaqinakaw munasirakïna, jupanakaw wakicht’äw uñt’ayañ chiq k’achacht’apxarakïna.

Uka maranakax, “Enfoques” wakicht’äw uñstayapxarakïna, tata Mario "Cucho" Vargas yatiyiriw ukx irptarakïns wakt’ayarakïnsa. Aka wakicht’äwinx markasampin anqa markanakampin jayllirinakaruw uñacht’ayapxäna.

Kimsaqallq tunka maranak purinxipanx, Televisión Boliviana ukax ENTB (Empresa Nacional de Televisión Boliviana) ukham sutiniw tukxatakïna.


1985 MARAT 1999 MARAKAMA

Bolivian markachirinak marka apnaqasxipanx, mayni sapa jaqinkir kanalanakax miratatañwa qalltawiyapxi, rinkunakan kunayman waruqt’at wakicht’äwinakap uñt’ayasaw mirantawiyapxäna. Akham utjipanx, ENTB ukax yatiyas ukhamarak yaticht’as sarantaskakïnwa.

Kimsaqallq tunka maranak niy tukuykipanx, tata Carlos Mesjam marka apnaqañxat arsurinakaw wakichäwinakan uñstañ qalltawiyapxäna; ukhamatwa, “taqi kunat yatiñanjam tukur jaqinakax” markan amuyup apnaqañ qalltapxarakïna, jupanakarux llätunk tunka jakhun maranakanw ukham sutichawiyapxarakïna.

Uñch’ukiyir utanakamp tamanakampix ch’amaniptañw qalltawiyapxi, ukañkamax markan yatiyäwinakapax juk’aptawiyarakiwa, ENTB ukax markar jisk’achir irpirinakan amuyunakapwa uñacht’ayañ qallantawiyarakïna.


2006 MARAT 2009 MARAKAMA

A Tata Evo Moralesax Jilïr Irpirjam mantawayki ukjata ukhamarak Bolivia Tayka Kamach markaspachan phuqhayañ qalltasiwayki ukjatpachx, marka kanalan saräwinakapwa mayamp amtañ qalltawiyataraki.

Ukhamatwa, 2009 maran qasäwi phaxsipäkipanx, Bolivia TV irnaqañ uta utt’ayañ amtatarakïna, markasan jakäwip jan k’arisis sum uñt’ayañataki. Ukatwa aka kanalan uñacht’ayat yatiyäwix Bolivia Markan chiqa yatiyäwiparaki.

Bolivia TV - 2018