Image Jamuqa: RTVE

George Floyd, juparux jach’unakaw Minneapolisan nayrïr urunakax jiwayawiyapxi, jupax ch’iyar janchin jaqïnwa. Jupan amayapx The Fountain of Praise yupaychañ utaruw jikisiñkam sasin sañatak puriyawiyapxi, Houston jach’a markana. Uka chiqarux kunayman jaqiw puriwiyapxi: marka apnaqir jaqinaka, markachirinakar arxatirinaka, anatirinaka, jakäw yatxapayas irnaqirinaka.

Al Sharpton tatakuraw yupaychañ wakichäw p’iqicht’awiyi, jupax Donald Trump Estados Unidos Jilïr Irpiriruw sartasirinakar tutukjayatapat arxayawiyi. “Goma muruq’unakamp jachayir jiq’impiw sumäñat sartasir markachirinakarux chhuksuyawiyapxi. Ukatx biblias apt’ataw mä yupaychañ uta nayraqatan sarnaqawiyi, ch’amachaskaspas ukham lurawiyi. Markpach apnaqirinakax sinti jan wali jaqinakawa” sasaw ch’amamp arsusiwiyi.

Tata Floydan wila masinakapax janq’ut isthapitaw uka chiqarux puriwiyapxi. Ch’iyar janchininakar jan walt’ayañatakiw aka markax apnaqata sasaw Brooke Williams jupax arsuwiyi, jupax George Floydan wila masiparakiwa, kamachianaka mayjt’ayañawa sawiyiwa. “¡Jan uñisisis jan walinak lurañax utjpant amp suma!” sasaw arsuwiyi.

Yupaychasiñ tukuyatatx, tata Floydan amayapx Houston jach’a marka kupituqun utjki ukaruw apxapxaraki. Uka chiqanw mamap jak’ar p’amp’achawiyapxaraki.

Derek Chauvinax 1.25 waranq waranq churasp ukax antutatäspawa sasaw Minneapolisanx mä taripirix amtawiyaraki, Derek Chauvinaw George Floydarux jiwayawiyaraki, jupax jach’uwa. J. Alexander Kueng, Thomas Lane, Tou Thao irnaqir masinakaparux jupar yanapapxatapatw taripasipkaraki./RAR