Image Qullqi Utan churat saminchatanaka (BTV)

P’utuqsi, 20 uru qasäwi phaxsita 2015 marana (BTV).- Evo Morales Ayma, Estado Plurinacional de Bolivian mallkupax, phaxsürux pä kutirayat saminchatanakw Qullqi Utar P’utuqsi Jach’a Markan churi, ukanakast Bolivian Taypïr Qullqi Utapan (BTQU) uñjatäniwa.

“Jichhürux aka pä saminchatanakw kutt’ayasktan , mayax 1700 ukjatawa yaqhast 1600 ukjataraki, P’utuqsi departamentutakix wali aski saminchatanakawa, arkir mallku jilatampix (Álvaro García Linera) Qullqi Utar kutt’ayañwa amtaptha, departamentonx taqit sipans jan walt’awinakatx jark’aqatawa”, sasaw p’iqichirix säna.

Uka pachparakiw, Bolivian saräwipan nayra maranakan lunthatat yänakap kutirayañatakix sarnaqasiskakiniwa, apnaqirinakan “lurañapawa” ukata, sasinw amtayawayi.

“Huida a Egipto”, “Virgen de la Candelaria”, sutin colonia pachankir saminchatanakax, markasaruw purinipxi ukhamarakiw markasar apanxasax, Suyu Apnaqañ Utan, Evo Morales mallkumpir Álvaro García Linera arkir mallkumpir uñacht’ayatapxänwa.

Paypachaw Estados Unidos markan jikxatatapxäna, 13 maraw San Martin de Potosí yupaychañ utat lunthatatapkän ukjatx mäkhipawayxäraki.  

Paypach saminchatanakax, yaqha 10 colonian saminchatanakamp chikaw, 2002 maran mara t’aqa phaxsit 20 urükipan lunthatatapxäna, ukanakast María Llumpaqan jakäwipat uñacht’ayir tamankiripxarakiwa. Pä maratx, 2004 marana, Estados Unidonkir apthapir chachamp warmimpiw, Richardamp Roberta Huberampi, San Pablo, Brasil markan paypach jamuqanakx mä jaqinkir luratanakamp phuqhantat utan alawayapxäna.     

Uka apthapirinakax EE. UU ukankir museonakan uñacht’ayañatakiw paypach saminchatanak askicht’awayapxäna, ukhamatw mä uñacht’äw taypinx Bolivia uraqin lunthatatapxatapat yatiyatapxäna, Bolivian lunthatat saminchatanakapiniskatap yatxatxasax, jan qullqi churatanakap mayisisaw kutt’ayañ amtapwayapxatayna./ERAR