Image Morales Jilïr Irpirin Twitter janjapa / Jamuqa: BTV

Evo Morales Jilïr Irpirix q’irwjas mun jan mun irnaqayañ jan utjañapatakiw jichhürux arsuwiyi. Jichhürux Q’irwjatanakat Amtasiñ Uruw amtata, ukx África chacha warminakan jan q’irwjayasiñatak sartasipxatap amtañatakiwa.

“Q’irwjatanakat Amtasiñ Urükipanx, khithinakati jan q’irwjañ utjañapatak sartasiwiyapki jupanakat amtasiñawa. Janiw uka sinti jan wali sarnaqäwisx armasiñasäkiti. Ukhamat jan qamirinakan q’irwjat sarnaqañasataki”, sasaw Twitter uksan qillqt’awiyi.

1791 maran 20, 23 urunak saraqkipanx Áfricat mun jan mun apanit jaqinakaw La Española (jichhax Haití, República Dominicana satäxiwa) wat’an jan q’irwjañ utjañapatak sartasipxatayna. Ukham sartasipxatapatw 1804 maranx Haití uksankirinakax yaqhaqtawiyapxi.

Uka sartasitaw jan yaqha uraqit q’irwjañatak jaqi apanipxañapatakix wali wakiskirjam amtata. Ukatw Naciones Unidas uksankirinakax 1994 maran Q’irwjatanakat Amtasiñ Uru amtañ amtawiyapxi. Ukax jaqi masisar uraqpachan arxatañatakirakiwa./RAR