Image COED ukankirinakax marka irpirinakampiw tantachasisipki (Jamuqa: BTV)

Santa Cruzanx Centro de Operaciones de Emergencia Departamental (COED) ukankirinakaw wasärmax tantachasiwiyapxi. Uka tantachäwinx uka jach’a marka irpirinakamp markaspach irpirinakampis jikxatasiwiyapxarakiwa. Jupanakax utat utw usutanak jikxatañatak sartañ amtawiyapxi (kasmisti Trinidad jach’a markan lurasiwayki ukhama). 40.000 utjäwiruw puriñ munapxi, 15 uruw utat utx sartapxani.

“Kunjams utat utx sartatäni. 40.000 utjäwiruw puriñ munata. 1.500 chiqar puriñatakiw qullirinakax qutuchaña, markachirinakamp chikäñapa” sasaw mama Angélica Sosax arsuwiyi, jupax Santa Cruz de la Sierra jach’a marka irpirirakiwa. Jupamp, Rubén Costas, Santa Cruz irpirimp, Arturo Murillo, Marka Apnaqañ P’iqichirimpiw tantachäwinkawiyapxi.

Aka mara t’aqa phaxsit 1 uru saraqkipanw Trinidad jach’a markx jark’antañ qalltawiyapxi. Qullirinakax utat utw usutanak jikxatañatakix sartawiyapxi. Jichhax ukas kipkakw Santa Cruzanx lurapxani.

Khithinakas COVID-19 usump usuntat jikxatasipxi jupanakar jikxatañatakiw ukham utat utx sartatäni sasaw mama Sosax qhanancht’awiyi. “Qullirinakaw uñjapxani. Janiraw qullanakamp yatxataskaniti, ukhamarus qullirinakax uñjasaw khithis usut ukx yatipxaspa. Wakisk ukhamarjamaw qullapxarakispa” sasaw jupa mama irpirix arsuwiyi.

Markaspachanx, Santa Cruzanw COVID-19 usuninakax juk’amp waljani. Wasürkamax 8.811 usutaw utjawiyi, ukhamw Qullañ P’iqichirix yatiyawiyi. 70% usutaw Santa Cruz de la Sierra jach’a markanpinx jikxatasipki./RAR