Image

San Crixtobal Qhuyanx pä jaqiw nayrïr phaxsit 27 uru saraqkipanx COVID-19 usump usuntat uñstawiyi, ukatw Toldos sutin chiqanx 14 uru utan jist’antat jakañ amtawiyapxi, uka qhuyax P’utuxsinw jikxatasi. Usutanakax jan amuykayakiw usump sarnaqapxatayna, jichhax walikiw jikxatasisipki, qullirinakaw jupanakarux qullasipki.

“Panpachaniw janis usutäpkasp ukham jikxatasipxi. Jupanakarux janiw irnaqäwin piykatapkiti. Ukjat ukjatw khithis usut uk yatiñatakix yatxatata, ukatw (jupanakarux) katjawiyata. Anchhax jupanakax walikïsipkiwa, wakisk ukhamarjamaw qullirinakax uñjasipki” sasaw wasürux San Cristobalankirinakax yatiyawiyapxi.

Llamayu phaxsit 16 uru saraqkipanw San Cristobalanx mayamp irnaqañ qalltawiyapxi, irnaqirinakan jan usuntapxañapatakix amtanakax phuqhatäskarakiwa.

Pä usut utjatapatx irpirinakar yatiyxapxtwa, jupanakarux kunjamas usutanakax jixkatasisipki ukaw ukjat ukjat yatiyatäni sasaw sawiyapxi./RAR