Image Iván Canelas Yatiqañ Uta / Jamuqa: UCP

Álvaro García Linera Sullka Irpirix Ivan Canelas sutin yatiqañ utwa jichhürux Vinto markan luqtawiyi. Jupamp chikax mama Patricia Arcew puriwiyi, jupax Vinto alcalderakiwa. Mama Arcex, aka yatiqañ utanx Pacha Sum Uñjas Yapuchaña, Makinanak Uñjaña, Manq’ Phayaña ukhamaw yatiqañax utjani, sasaw sawiyi.

7 Waranq waranq bolivianompiw uka yatiqañ utx irnaqayapxatayna. 13.535 m2 uraqiruw utachapxatayna. Uka chiqanx, alinak apnaqañ utamp, makinanak uñjañ utamp, k’ullu khuchhuñ utamp, k’añask apnaqañ utamp, pusi khust’at yatichañ utampiw utji. Jutir maraw ukanx yatichañ qalltapxani.

Ukhamïpanx, García Linera Sullka Irpirix yatiqir waynanakaruw kuns yatiqapxañapatak ch’amacht’awiyi, juk’ampis machaq yänak apnaqañ yatichäwinak katuqapxañap mayiwiyi. “Machaq yänak apnaqañ yatiqañ ajllt’asipxma. Anchhax Boliviax machaq yänak apnaqañatakiw Evo jilatax qullq churaski”, sasaw Sullka Irpirix sawiyi.

Uka pachparakiw, tata Linerax waynanakarux yatiqañ tukuyatat juk’amp yatiqapxañap mayiwiyi. “Ajllipkät uka yatiqäwinx taqit sumäpxam” sasaw jupa irpirix arsuwiyi./RAR