Image Áñez Jilïr Irpirix wilwa apsuyasiwiyi (Jamuqa: BTV)

Usutanakar yanapt’añatakix “Tu sangre da vida” wakichäwimpiw jichhürux irnaqañ qalltawiyapxi. Jeanine Áñez Jilïr Irpiriw nayraqatx wilx apsuyasiwiyi. Usutanakar yanapt’añatakiw wilx inak apsuyasiñäni, COVID-19 usuw markasarux jan walt’ayaski sasaw jupax markachirinakar iwxt’awiyi.

Jilïr Irpirix yaqha marka irpirinakamp chikaw uka wakichäwimp irnaqañ qalltayawiyi. Eidy Roca, Qullañ P’iqichiris ukankawiyarakiwa. Jurpüruw uraqpachanx Usutanakatak Wila Churirinakan Urupax amtatäni, ukatw ukham lurawiyapxaraki.

“K’umar jikxatasipki taqi uka markachirinakaruw akham lurapxañap mayiñ muntha, walja jaqiw (wilx qullasiñatak) munapxi. Anchhax jan walt’äwinktanwa, sinti ch’ama ch’am tukuñ urunakanktanwa. Yaqha jaqi masisaw yanapt’ktan ukjaw chuymasas chuymasaxa” sasaw Murillo palasanx wil apsuyaskasax arsuwiyi.

Marka irpirinakax “Tu sangre da vida” wakichäwimpiw jichhürux irnaqañ qalltawiyapxi. Ukhamatw COVID-19 usump usut jikxatasipki jupanakar yanapt’añatakix irnaqasipki, wila umaw jupanakatakix munasi. Yaqhip qullqichirinakax khithinakati wila umx churapkan jupanakatakix yanapt’anakaw utjani sasaw sawiyapxi.

“Jan (wila) aljañax utjpanti. Anchhax jila kullakanakasax usuntasipkiwa, ukatw jupanakar yanapt’añax khusaraki. Khithinakati uka usut waliptawiyapkio taqi jupanakax ukham lurapxaspa ukax walipinïspawa (…) Jichhax wila umampiw qullasispa. Jan aljapxamti sasin sañ munapxsma. Jaqjam sarnaqañäni, juk’amp yanapt’asiñäni” sasaw jupax arsuwiyi.

Marka Apnaqañ Utaw uka wakichäwimp irnaqañx qalltayawiyapxi. Khithinakati COVID-19 usut waliptas wila umap yaqhanakatak churawiyapki jupanakarus yäqt’awiyapxarakiwa./RAR