Image (Jamuqa: Llikan imata)

Chukiyawu, 2015 maran qasäwi phaxsinkir 27 urupa (BTV).- Bolivia Apnaqirinakax jichhürux Nepalaruw chuymacht’äw apayapxi, aka kurmürux khä Asiankir markanx mä t’uxthapir uraq khathatiw utjawiyi ukata, ukast anchhitkamax niya 4.000 jaqinakw jiwarayawiyaraki.

Mä yatiyir qillqatanx, Bolivian Anqa Markanakamp Aruskipt’ir Kamanipax “taqi ñanqhachatanakaruw chuymacht’i, irpirinakampir qhispiyir tamanakampir ch’amacht’asa, jupanakax aka jan walt’äwimp ñanqhachatanakar yanapt’añatak irnaqasipkakiwa”, sasinw uñt’ayi.

Aka kurmür Nepalan uñstir uraq khathatix 7,8 ukham ch’amaniw Richteran amuyuparjamax uñstatayna; qhipa jakhthäpiwinakarjamax, 3.900 jaqinakaruw jiwayawiyi ukhamarak 6.833 ukjaniruw usuchjawiyi, yamakis saräw luratanakx jan amuykañpin t’unthapiwiyatayna./ERAR