Image Yatiqirinaka (Jamuqa: La Patria)

Aka jach’a markanx Wuhan laq’ump usutaw utji sasaw yatiyawiyapxi, ukatw yatiqañ utanakar jan sarapxañapatak amtawiyapxtha, jach’a yatiqañ utanakans janiw yatiqatäkaniti, mayamp yatiqañatakix yatiyapxäwa sasaw tata Eduardo Garcíax arsuwiyi, jupax Uru Urunw yatichäw p’iqicht’askaraki.

“Janiw yatiyirix sarañjamäkiti. Taqpach yatiqäwiw suyt’ayawiyata, jach’a yatiqañ utanakans uka pachparaki, ukañkamax Wuhan laq’ tukjañatakix kunas munas ukw amtasipkäxa” sasaw yatiyirinakar sawiyi.

135.000 yatiqiriw aka jach’a markanx utji, jupanakan jan usuntapxañapatakiw ukham lurapxtha sasaw sawiyi.

Departamentpachanx, yaqha 20 distritonx, yatitäk ukhamaw yatichatäski, suyunakampin jisk’a markanakampin ayllunakampina, sasaw tata Garcíax sawiyi.

Jichhüruw yatichäw p’iqichirinakamp alcaldíankirinakamp Uru Uru irpirinakamp qullañ uñjirinakampiw (SEDES) kunjams jank’ak usutanakar yanapt’atäsp ukxat aruskipañatak tantachasipxani.

Pä Wuhan laq’ump usuntataw Bolivianx utji, mayax Uru Urunkiwa, yaqhast Santa Cruzanraki; usutanakax pä warmiwa, Italiat purinipxatayna, maynix 60 maraniwa, maynirak 64 marani, paninirux yaqhaqtataw uñjatäski sasaw wasürux irpirinakax yatiyawiyapxi./RAR