Image Jach'a aljañ utanaka (Jamuqa: Llika)

Jichhürut uksarux 7:00 arumirjat 2:00 jayp´ukamaw jach’a aljañ utanakax jist’aratäni, walja jaqin jan phuqhthaptañapatakiw ukham luratäski, jan usu piykatayasiñataki sasaw tata Sergio Weisex yatiyawiyi, jupax Bolivia Jach’a Aljañ Utaninakan (ASOBSUPER) irpiriparakiwa.

“Irpirinakan amtanakaparjamax, jach’a aljañ utanakax juk’amp pachaw jichhürut uksarux markaspachan jist’aratäni” sasaw El Deber ukankirinakar sawiyi.

Aka phaxsiw 8 uru saraqkipan uka amtax mayjt’ayatäspa, uküruw Qullañ P’iqirix kunjamas utan qhiparatäni ukxatx amtanak uñt’ayani sasaw qhanancht’awiyi.

“Aka llamayu phaxsit 8 uru saraqkipanw uka amtatx mayamp amuykipt’atäni, uküruw Qullañ P’iqichirix arsuni, kawkhanakans chhijir puriñjamäski ukw kastachani (sinti, tantiyu, juk’a ukhama). Ukatatw, kunayman chiqanakan, municipionakan (aljañ) pachax uñt’ayatäni, ukhamarus ukjakamax taqiniw uka pachpak sarnaqaskañäni” sasaw qhanancht’awiyi.

Alasirinakan jan usuntapxañapatakix kunjamati munaski ukhamaw jach’a aljañ utanakanx phuqhatäski, kamisti jan usuntañatakix amtanakax utji ukhamarjama sasins qhanancht’awiyarakiwa”/RAR