Image Dakar uñt'ayäwi (BTV)

Chukiyawu, 24 uru qasäwi phaxsita 2015 marana (BTV).- Evo Morales Ayma, Estado Plurinacionalan mallkupax, Amaury Sport Organisation (ASO) ukan irpirinakapampi chikax, urürux 2016 Dakar Atip Atip T’ijuñwa chiqpach uñt’ayawiyapxi, ukax jichhampix kimsa kutiw Bolivian uraqipäm mäkhipxani.

“Bolivialaykux irnaqaskañakw munasipktha ukhamarakiw (aka luräwinakax) kunjams markasan qullqichäwip unxtayapxi ukaw muspharayitu, mayacht’asiñas utjarakiwa, Bolivia markampin, palla pallanakampin, jach’unakampin yanapt’apxañapw suyasipkaraktha” sasaw Bolivian suyu P’iqichiripax qhanancht’awiyi.

Uka pachparakiw, kunjams Bolivia markax Dakaran atipt’asirinakar q’ayacht’awiyäna uk jallallt’awiyi ukhamarak atipt’asirinakar yanapt’askañakw mayiwiyi.

Ukhamatw, atipt’asirinakatakix Boliviäm t’iskuñax yant’äwikaspas ukhamäniwa, jupanakax pacha mayjt’äwinakampiw jikisipxani, sasaw Étienne Lavigne, ASO p’iqichirix, sawiyi.

“Atipt’asirinakax Bolivia thakhinakx uñt’apxiwa ukhamarakiw munapxi, ukampirus jasq’arañas utjarakiwa kunattix atipt’asiñan kankañapamp sarañ uraqinakapampix ch’amaspawa, aka uraqix qamasaninakampitak axsaririnakampitakiwa. 2016 maranx, taqpach kasta t’iskur tamanakaw akankapxani, Titi Qaqa qutatpach Uyuni  jayu pampkama, Uru urumpin Uyunimpinw samart’añ chiqanakax utjani”, sawiyarakiwa.

Maysa tuqutx, atipt’asïwix anata phaxsit 3 uru saraqkan ukjat 16 urükan ukjakamaniwa, Pirwa markäm makhipani, Boliviaruw mantanini ukatatx Argentinanw tukuyani, sasaw Gregory Murac, ASOn  Yaqha Markanakamp Aruskipt’añ p’iqichiripax qhanancht’awiyi.

“Llamayu phaxsit 15 urükipanw qillqantäwinakax qalltani, willka kuti phaxsit 15 uruw qillqantt’äwinakax jist’antasini, lapaka phaxsix Sudamérica uraqinkir t’iskurinakatakiw mä amuyt’ayañ mathapïwix utjani, khithinakati juk’amp yatxatañ munapk jupanakataki (..) Jallu Qallta phaxsi tukuykipanx k’añaskunakaw puriyatäni, uka k’añaskunak uñakipt’añax 1 ukhamarak 2 urunak chinuqa phaxsit saraqapkani ukjarakiw lurasini. Atipt’äwix 3 urut 16 urukamaw luratäni, Bolivia, Pirwa ukhamarak Argentina uraqinakämw mäkhipani”, sasaw arsuwiyi./ERAR