Image Michael Ryan, OMS ukan jank'ak usunaktuq irnaqañ p'iqichiri (Jamuqa: Llika)

COVID-19 usump usuntayir laq’ux inas janipin chhaqhtkchiniti, utjaskakispawa, ukatw uka laq’ump jakañ yatiqañasa sasaw Uraqpachañ Qullañ Uñjir Utankirinakax (OMS) sawiyapxi.

Tata Michael Ryanaw wasürux llikanx Ginebra jach’a markatpach (Suiza) ukham arsuwiyi, jupax OMS ukanw jank’ak usunaktuq irnaqañ p’iqicht’aski. “Aka ch’imi laq’ux markanakasan utjaskakispawa, inas janipin chhaqhkchiniti” sasaw tata Ryanax sawiyi.

COVID-19 usump usuntayir ch’imi laq’ux Chinanw mimarax uñstawiyi, jank’akiw yaqha uraqpachanx yaqha markanakar saratatawiyaraki.

Ch’uxusa, jach’ukisa, jan jarisit amparamp nayra jan ukax laka jan ukax nasa llawq’asisaw uka laq’ux janchisar mantaspa. Uka laq’ux aruskipasas mantarakistaspawa, ch’imi laq’ux samanan jikxatasispa, arskasax ch’imi ch’aqanak lakat jaqstan ukata, ukhamw yatxatäwinakax uñstaski.

“Jichhak uñstir laq’uw jaqi taypir mantaski; ukhamïpanx, janiw kunapachas chhaqhtayañäni ukx sisksnati” sasaw jupax akürunakax uraqpachan jan walt’äwix utjki ukxatx sawiyi./RAR