Image Álvaro Coimbra, Taripäw Uñjañ P'iqichiri (Jamuqa: BTV)

Tayka Kamach uñakipirinakaruw Estados de Excepciòn kamachxat arsupxañap mayita sasaw wasärmax tata Álvaro Coimbrax yatiyawiyi. Kamachiñ Tantachäwinw uka kamach utjañapx amtawiyapxi, ukanx MAS ukankirinakaw jiläpxi, ukhamarus janiraw apnaqatäkaniti.

“Marka irpirinakan lurañap uka kamachix jan walt’ayi (…) Jupanakaw ukham kamach utjañapx amtawiyapxi, Kamachiñ Tantachäwitpachw marka irpirinakarux jaqsuñ munasipki” sasaw jupa tata irpirix arsuwiyi.

Uka kamachimpix janiw marka irpirinakaruk jan walt’ayañ munapkiti, COVID-19 usu tukjañatak amtawiyatäki ukw jan walt’ayañ munapxi, markachirinakar qullqix churawiyatäki uks jan walt’ayañ munarakiwa sasaw tata Coimbrax arsuwiyi.

“Kamachiñ tantachäwinkirinakax uka kamachimpiw jaqsuñ munapxitu, akham lurasipki: taqin utamat mistupxam, janiw kuna chhijirus purksnati, municipionakax janiw kuns uñjapkaspati, marka irpirinakax janiw kuns uñjapkaspati, gobernacionanakax janiw kuns uñjapkaspati sasins sapkaspa ukhamawa” sasaw tata Coimbrax arsuwiyi.

TCP ukar ukham mayitatx, mama Eva Copax janiw kamach rixt’kaspati, TCP ukan arsut suyañapa, jan wal luratapatw taripayasispa sasaw tata Coimbrax arsuwiyi.

Nadia Cruz, Marka Arxatirix uka kamach utjañap munarakikiwa sasaw tata Coimbrax qhanancht’awiyi.

“Bolivian jiwatanak utjañapatakiw MAS ukankirinakax irpasipkistu, qullañ utanak phuqharañapataki, sinti jan walir purt’asiñasataki” sasaw sawiyi./RAR