Image Cejanx akhamw k'añaskunakax sarnaqasipki (Jamuqa: BTV)

K’añaskuninakax mayamp irnaqañ jichhürux Altu Patan qalltawiyapxi. Uka jach’a marka irpirinakax 24 chiqanw k’añaskunak sarnaqirx uñjapxani, jan usuntañatakix k’añaskuninakax phuqhasipkit janich ukw uñjapxani, ukhamw tata Fernando Floresax arsuwiyi, jupax uka jach’a markan k’añaskunak sarnaqir uñjañ p’iqicharaki.

“24 wakiskir chiqanw k’añaskunak uñjañatakix jikxatasita. Kañask jark’antañawjanakampin (jach’a) thakhinak jikthaptäwjanakampin jikxatasipxtha (…) Wali arumirjatpach uñjawiyapxtha” sasaw tata Floresax arst’awiyi.

Jichhürut uksaruw k’añaskuninakax irnaqañ qalltxapxi, 5:00 qhjantatit 2:00 jayp’ukamaw phaxsürut urürkam k’añask jakhuparjam irnaqapxani sasins yatiyawiyarakiwa. Phaxsürux 1, 2, 3, 4 jakhun k’añaskunakaw mistupxani; atürux 5, 6, 7, 8 jakhuninaka; warürux 9, 0, 1, 2 jakhuninaka, illapürux 3, 4, 5, 6 jakhuninaka; urürurakiw 7, 8, 9, 0 jakhuninaka. Kurmürump willkürumpix janiw khithis irnaqir mistkaniti.

Aka chiqanakanw uñjasipki: Sinqata k’añask jark’antañäwjana, Waña Jawir chakana, Ballivian palasana, Chaka Altayana, Cejana, yaqha chiqanakans utjarakiwa./RAR