Image

27 de Julio sutin k’añask apnaqirinakaw wasürux qullirinakar q’ipir k’añaskur Wanunin tutukxatawiyapxi. Uka markar mantkipanw ukham lurawiyapxi, jan jupanakamp q’ipiyasipxatapatw ñanqhasiwiyapxarakitayna. Ukhamanak utjipanw qullirinakax irnaqäw sayt’apki.

“Uru Urut Wanuniruw sarapxtha. Wanuni markar mantkasax k’añaskuruw tutukxatanipxi. Mä sintikatunkirinakaw ñanqhachawiyapxitu. Sarapktha uka k’añaskun kayunakap thisirayawiyapxi (…) Qullirinakarux jan wali arunakampiw arxayawiyapxi. Jichhax (irnaqañx) axsarayasipxiwa” sasaw tata Iván Romerox Bolivia TV ukan arsuwiyi, jupaw qullirinakx khayar q’ipiyaskarakïna.

Qullirinakax jan usuntañatak amtanakax utjki ukx Wanunir sarañatak phuqhawiyapxiwa sasaw tata Romerox sawiyaraki.

Wanunin jan irnaqayirjam amuyasax, qullirinakax irnaqäw sayt’añw amtawiyapxi. “Qullirinakarux jan walt’ayawiyapxiwa, taqi qullañ utan irnaqirinakaru, San Martín de Porres tantiy qullañ utan irnaqirinakaru, Bartolina Sisa jisk’a qullañ utankirinakaru ukhamarakiw kunayman qullañ chiqanakan jikxatasipki jupanakarusa, ukatw irnaqañ sayt’añ amtawiyapxi. Markachirinakar yäpar uñjañatakix, jan walt’äwinak jan utjañap mayisipktha” sasaw tata Romerox arsuwiyi./RAR