Image Evo Morales Ayma, Estado Plurinacional de Bolivian mallkupa ( Foto: BTV)

Santa Cruz, 20 uru qasäwi phaxsita 2015 marana (BTV).- Evo Morales Ayma, Estado Plurinacional de Bolivian mallkupax, atürux “Bolivia Satasa” Yapuchañ Uywachañ Ulaqwa Santa Cruzankir Uñacht’ayañ Jach’a Qhathupan (Fexpocruz) Chiquitano sutin jach’a utapanx qalltawiyi.

“Boliviatakix aka wali aski urur puriñax wali askïtapatx yatiraktwa, janiw yapuchirinakampitak uywachirimpitak alasirinakampitakik ukhamäkiti jan ukax Boliviar yanapañapwa wal muntan” sasaw p’iqichirix qhanancht’i. 

Uka pachparakiw, yapuchatampin yapuchatanak mayjaptayañampin Producto Interno Bruto (PIB) ukap jiltayañatakix mä wakt’ayäw amtapxañapw ukankirinakar mayiwIyi, 2020 marakamax 10.000 waranq waranqa dolaranak utjañapataki.

“Munat masinaka, jisk’a, tantiyu, jach’a yapuchirinaka, tamanaka, jaymäwinaka, wila masipur irnaqirinaka, yapuchañtuqunx mä lurañanitanwa, ukwa amuytha, puriñ munsna, 2020 maranx, yapuchatampin yapuchatanak mayjaptayañampin PIB ukapax 10.000 waranq waranq dolaranakakispasa ukham taqinis tukuyañasawa”, sawiyiwa.

Maysatuqutx, Bolivian yapuchañ uywachañ jiltayañatakix, tecnología apnaqataw markasanx askicht’aña, ukampirus ch’amanchirinakamp umamp jikxatañatak ch’amancht’aña ukhamarak uraq ch’amamp aparirinakax janiw utjañapäxiti, sawiyiwa. Uraqinakax irnaqañatakiñapawa, janiw jaqhip irpirinakax lurapk ukham qullqichañatakiñapäkiti, sasaw sawiyaraki. 

Ulaqanx, transgéniconak apnaqañxat, anqar apsuñanak juk’amp jasaptayañxat ukhamarak thakhinakxat, yapuchañ uraqinak jach’aptayañxat ukhamarak kamachinakamp arxatañxatw qut qut sartas aruskipt’asini./ERAR