Image Herland Soliz, YPFB nayra irpiri

Herland Soliz, Yacimientos Petrolíferos Fiscales Bolivianos (YPFB) nayra irpirirux katuntañawa, jupax janiw jan wali apnaqatanakat arsur jutkiti sasaw wasürux tata Alexis Vilelax arsuwiyi, jupaw taripañatak yatxataskaraki.

“Yatxatasipktha ukxat arsuñapatakix, tata Herland Solizarux jawsayatawa; ukhamarus jupax janiw arsur jutkiti. Pä kutiw jawsayawiyata, ukampirus janiw jutanit janich ukxatx yatiskiti. Ukatw taripañatak yatxatirinakax (kamachinak) phuqhas jupar katuntañ amtawiyapxtha” sasaw tata Vilelax arsuwiyi.

YPFB nayra irpirirux seguro jank’ak achikañ munatayna sasaw juchx jaqusipki; Tayka Kamach t’unjasaw irnaqañ amtatayna, janiw irnaqañx phuqhkataynati, uñt’atanakampiw kamachinak t’unjas yanapayasitayna sasaw sapxi.

Taripañatak yatxatirinakax arknaqasipkituwa sasaw tata Solizax arsuwiyaraki. Chukiyawun taripañatak yatxatirinakax arknaqasipkituwa, ukw taqinir sañ munapxsma, utajarux kamachinak t’unjas inas mantanipxchini; anchhakamax janiw kuna yatiyäwis utajarux purkiti sasaw sawiyi./RAR